சென்னையில், பெண்களுக்கான டபிள்யு.டி.ஏ., 250 அந்தஸ்து பெற்ற

சென்னை ஓபன் டென்னிஸ் தொடரின் மூன்றாவது சீசன் நடக்கிறது. ஒற்றையர் பிரிவு 2வது சுற்றில், இந்தியாவின் மாயா ரேவதி, போலந்தின் வெரோனிகா பால்கோவ்ஸ்கா மோதினர். முதல் செட்டை 6-4 எனக் கைப்பற்றிய மாயா, இரண்டாவது செட்டை 6-3 என வென்றார். ஒரு மணி நேரம், 33 நிமிடம் நடந்த போட்டியில் அசத்திய மாயா 6-4, 6-3 என்ற நேர் செட் கணக்கில் வெற்றி பெற்றார். இதன்மூலம் சென்னை ஓபனில் காலிறுதிக்கு முன்னேறிய முதல் இந்திய வீராங்கனையானார் மாயா.

மற்றொரு போட்டியில் 'நடப்பு சாம்பியன்' இந்தோனேஷியாவின் ஜானிஸ் டிஜென், சீனதைபேயின் ஜோன்னா கார்லாண்ட் மோதினர். இதில் டிஜென் 7-6, 6-1 என்ற நேர் செட் கணக்கில் வெற்றி பெற்று காலிறுதிக்குள் நுழைந்தார்.

மற்றொரு 2வது சுற்று போட்டியில் அமெரிக்காவின் ராபின் மான்ட்கோமெரி, பெல்ஜியத்தின் ஜெலின் வான்ட்ரோம் மோதினர். இதில் மான்ட்கோமெரி 6-4, 3-6, 7-5 என போராடி வெற்றி பெற்றார். உஸ்பெகிஸ்தானின் போலினா குடெர்மெடோவா 6-3, 6-0 என, ஸ்பெயினின் ஒக்சானாவை வென்றார்.

வைஷ்ணவி ஜோடி அபாரம்

பெண்கள் இரட்டையர் பிரிவு முதல் சுற்றில் இந்தியாவின் வைஷ்ணவி, ருதுஜா ஜோடி 6-4, 6-4 என, பிரிட்டனின் மேடலின் புரூக்ஸ், அமேலியா ராஜெக்கி ஜோடியை வீழ்த்தி காலிறுதிக்கு முன்னேறியது. மற்றொரு போட்டியில் இந்தியாவின் தியா, தீப்ஷிகா ஜோடி 2-6, 2-6 என, சுவிட்சர்லாந்தின் நைமா கரமோகோ, சிமோனா வால்டெர்ட் ஜோடியிடம் வீழ்ந்தது.