சென்னை, மதுரையில், ஜூனியர் உலகக்கோப்பை ஹாக்கி 14வது சீசன் நடந்தது. சென்னையில் உள்ள மேயர் ராதாகிருஷ்ணன் ஹாக்கி மைதானத்தில் நடந்த வெண்கலப் பதக்கத்துக்கான போட்டியில் இந்தியா, அர்ஜென்டினா அணிகள் மோதின. அர்ஜென்டினாவுக்கு 3வது நிமிடத்தில் கிடைத்த 'பெனால்டி ஸ்டிரோக்' வாய்ப்பில் நிக்கோலஸ் ரோட்ரிக்ஸ் ஒரு கோல் அடித்தார். முதல் பாதி முடிவில் அர்ஜென்டினா 1-0 என முன்னிலையில் இருந்தது.

இரண்டாவது பாதியில், 44வது நிமிடத்தில் அர்ஜென்டினாவின் சாண்டியாகோ பெர்னாண்டஸ் ஒரு 'பீல்டு' கோல் அடித்தார். 48 நிமிட முடிவில் இந்தியா 0-2 என பின்தங்கியது. கடைசி 12 நிமிடத்தில் இந்திய வீரர்கள் எழுச்சி பெற்றனர். 49வது நிமிடத்தில் அங்கித் பால், 52வது நிமிடம் மன்மீத் சிங், என இருவரும் 'பெனால்டி கார்னர்' வாய்ப்பில் தலா ஒரு கோல் அடித்தனர். ஸ்கோர் 2-2 என சமன் ஆனது.

தொடர்ந்து அசத்திய இந்தியாவுக்கு 57 வது நிமிடத்தில் 'பெனால்டி ஸ்டிரோக்' கிடைத்தது. எளிதான இந்த வாய்ப்பை, ஷர்தானந்த் திவாரி கோலாக மாற்ற இந்தியா 3-2 என முந்தியது. அடுத்த நிமிடம் அன்மோல் எக்கா (58வது) 'பெனால்டி கார்னரில்' கோல் அடிக்க, ரசிகர்கள் உற்சாகம் அடைந்தனர்.

முடிவில் இந்திய அணி 4-2 என்ற கோல் கணக்கில் வெற்றி பெற்று, முதன்முறையாக வெண்கலம் கைப்பற்றியது. தவிர, ஜூனியர் உலக கோப்பை வரலாற்றில் 9 ஆண்டுகளுக்கு பின் இந்தியாவுக்கு பதக்கம் கிடைத்துள்ளது. கடைசியாக 2016ல் சாம்பியன் பட்டம் வென்றிருந்தது.