இந்தியாவில், புரோ கபடி லீக் 12வது சீசன் நடக்கிறது. 'நடப்பு சாம்பியன்' ஹரியானா, மும்பை, பெங்களூரு, தமிழ் தலைவாஸ் உள்ளிட்ட 12 அணிகள் பங்கேற்கின்றன. நேற்று, சென்னையில் நடந்த லீக் போட்டியில் தமிழ் தலைவாஸ், ஹரியானா அணிகள் மோதின. முதல் பாதி முடிவில் தமிழ் தலைவாஸ் அணி 13-15 என பின்தங்கி இருந்தது. இரண்டாவது பாதியில் எழுச்சி கண்ட தமிழ் தலைவாஸ் அணி, ஹரியானா வீரர்களை மூன்று முறை 'ஆல்-அவுட்' செய்தது.

ஆட்ட நேர முடிவில் தமிழ் தலைவாஸ் அணி 45-33 என்ற கணக்கில் வெற்றி பெற்றது. தமிழ் தலைவாஸ் அணிக்கு கேப்டன் அர்ஜுன் தேஷ்வால் 22 புள்ளி பெற்றுத் தந்தார்.

இதுவரை விளையாடிய 11 போட்டியில், 5 வெற்றி, 6 தோல்வி என 10 புள்ளிகளுடன் தமிழ் தலைவாஸ் அணி 8வது இடத்துக்கு முன்னேறியது.

டில்லி அபாரம்: மற்றொரு லீக் போட்டியில் டில்லி, உ.பி., அணிகள் மோதின. உ.பி., வீரர்களை 'ஆல்-அவுட்' செய்த டில்லி அணி, முதல் பாதி முடிவில் 17-13 என முன்னிலையில் இருந்தது. இரண்டாவது பாதியிலும் ஆதிக்கம் செலுத்திய டில்லி அணிக்கு 26 புள்ளி கிடைத்தது. ஆட்டநேர முடிவில் டில்லி அணி 43-26 என்ற கணக்கில் வெற்றி பெற்றது. டில்லி அணிக்கு கேப்டன் அஷு மாலிக் (14 புள்ளி), அஜின்கியா பவார் (4) கைகொடுத்தனர். உ.பி., அணி சார்பில் ககன் கவுடா 12 புள்ளி பெற்றார்.

இதுவரை விளையாடிய 10 போட்டியில், 9 வெற்றி, ஒரு தோல்வி என 18 புள்ளிகளுடன் டில்லி அணி முதலிடத்துக்கு முன்னேறியது.