சென்னை கடற்கரை -- தாம்பரம் - செங்கல்பட்டு தடத்தில், தினமும் 250க்கும் மேற்பட்ட மின்சார ரயில்கள் இயக்கப்படுகின்றன. தினமும் 3 லட்சத்திற்கும் மேற்பட்டோர் பயணிக்கின்றனர்.

பயணியர் வருகை நாளுக்கு நாள் அதிகரித்து வருகிறது. பயணியர் நலனை கருத்தில் வைத்து, தாம்பரம் - செங்கல்பட்டிற்கு நெரிசல் மிக்க நேரங்களில், மின்சார ரயில்கள் இயக்கப்பட்டு வருகின்றன.

குறிப்பாக, தினமும் காலை 7:10, 7:20, 7:35, 7:47, 8:00 மணிக்கு ரயில்கள் இயக்கப்பட்டு வந்தன.

இந்த நிலையில், காலை 7:47 மணி ரயில் திடீரென எவ்வித அறிவிப்பும் இன்றி ரத்து செய்யப்பட்டுள்ளது. இதனால், பயணியர் அவதிப்படுகின்றனர்.

இது குறித்து, பயணியர் சிலர் கூறுகையில், 'தாம்பரம் - செங்கல்பட்டு தட சாலை போக்குவரத்து அதிகரித்து வருவதால், பெரும்பாலானோர் கூடுதல் ரயில் இயக்க வேண்டுமென வலியுறுத்தி வருகிறோம்.

இந்த நிலையில், காலை 7:47 மணி ரயில், திடீரென ரத்து செய்யப்பட்டுள்ளது ஏமாற்றத்தை ஏற்படுத்தி உள்ளது. பயணியரின் கோரிக்கையை ரயில்வே அதிகாரிகள் பரிசீலிக்க வேண்டும்' என்றனர்.

சென்னை ரயில் கோட்ட அதிகாரி ஒருவரிடம் கேட்ட போது, 'பயணியரின் புகார் குறித்து ஆய்வு செய்யப்படும்' என்றார்.