கோடம்பாக்கம், டாக்டர் அம்பேத்கர் சாலையில் கோடம்பாக்கம் மண்டல அலுவலகம் அமைந்துள்ளது. இந்த அலுவலக வளாகத்தில், அரசு இ - சேவை மையம் அமைந்துள்ளது.

இங்கு, பல்வேறு சான்றிதழ்களுக்கு விண்ணப்பிக்க, தினமும் 50க்கும் மேற்பட்டோர் வந்து செல்கின்றனர்.

இதனால், தகர ஷெட்டால் அமைக்கப்பட்டுள்ள இந்த 'இ - சேவை' மையத்தை ஒட்டி, சிலர் சிறுநீர் கழிப்பதால் கடும் துர்நாற்றம் வீசுகிறது.

இதனால், இ - சேவை மையத்திற்குள் வரும் பயனாளிகள், மாஸ்க் அணிந்தும், மூக்கை பிடித்தபடி நிற்கும் அவல நிலை உள்ளது.

பொதுமக்களுக்கான கழிப்பறையும், இருக்கும் இடம் தெரியாமல் உள்ளது. அதுவும் பயன்படுத்த முடியாத வகையில் படுமோசமாக உள்ளது.

அத்துடன், இ - சேவை மையத்தை ஒட்டி, தேவையற்ற பொருட்கள் குவித்து வைக்கப்பட்டுள்ளன. அங்கே சிலர் மது அருந்தி, பாட்டில்களையும் விட்டு சென்றுள்ளனர்.

பொதுமக்கள் தினசரி வந்து செல்லும், சென்னையின் மத்திய பகுதியில் உள்ள அலுவலகத்தின் நிலைமையே படுமோசமாக உள்ளது, அதிருப்தியை ஏற்படுத்தி உள்ளது.