கிண்டியில் உள்ள மெட்ராஸ் ஐ.ஐ.டி., சார்பில், 2025ம் ஆண்டிற்கான விளையாட்டு திருவிழா நடந்து வருகிறது. இதில், கூடைப்பந்து, வாலிபால் உள்ளிட்ட 12 வகையான போட்டிகள் நடக்கின்றன.

நேற்று நடந்த ஆண்கள் வாலிபால் இறுதி லீக் சுற்றுகளில், 25 - 12, 25 - 15, 25 - 12 என்ற கணக்கில், ஐ.ஐ.டி., மெட்ராஸ் அணியை வீழ்த்தி, லயோலா அணி வெற்றி பெற்றது.

மற்றொரு போட்டியில், ஹிந்துஸ்தான் அணி, 25 - 16, 25 - 21, 25 - 19 என்ற கணக்கில், ஒய்.எம்.சி.ஏ., அணியை தோற்கடித்து வெற்றி பெற்றது. லயோலா, ஹிந்துஸ்தான் அணிகள் இறுதி போட்டிக்கு தகுதி பெற்றன.

அதேபோல், நேற்று நடந்த கூடைப்பந்து லீக் ஆட்டத்தில், எத்திராஜ் அணி, 27 - 11 என்ற கணக்கில் ஐ.ஐ.டி., மெட்ராஸ் 'பி' அணியையும், ஐ.ஐ.டி., மெட்ராஸ் 'ஏ' அணி, 38 - 23 என்ற கணக்கில் சென்னை வி.ஐ.டி., கல்லுாரி அணியையும் வீழ்த்தின.

ஹாக்கி போட்டியில், அனைத்து சுற்றுகள் முடிவில், இறுதிப் போட்டிக்கு குருநானக் மற்றும் ஒய்.எம்.சி.ஏ., அணிகள் தேர்வாகி உள்ளன. இன்றுடன் போட்டிகள் நிறைவடைகின்றன.