கூட்டத்தில், மாவட்ட கண்காணிப்பு அலுவலர் ஜெயஸ்ரீ பேசியதாவது:

கோடை காலத்தில் தட்டுப்பாடின்றி குடிநீர் மற்றும் இதர உபயோகங்களுக்கு தண்ணீர் வழங்க நடவடிக்கை எடுக்க வேண்டும். தற்போது தேவைப்படும் அளவை விட, கோடையில் தேவை இன்னும் அதிகரிக்கும் என்பதால், குடிநீர் தட்டுப்பாட்டை தவிர்க்க புதிய வழிமுறைகளை பின்பற்ற வேண்டும்.

குழாய்களில் ஏற்படும் கசிவுகள், மின் மோட்டார்களில் ஏற்படும் பழுதுகளை போர்க்கால அடிப்படையில் சரிப்படுத்த வேண்டும். அனைத்து அலுவலர்களும் ஒன்றிணைந்து பணியாற்ற வேண்டும்.

நகராட்சிகள், பேரூராட்சிகள், ஊராட்சி பகுதிகளில் தேவையான குடிநீர் தங்கு தடையின்றி கிடைப்பதை சம்பந்தப்பட்ட துறை அலுவலர்கள் உறுதி செய்ய வேண்டும். சாமியானா பந்தல் அமைத்து, நீர் மோர் வழங்குவதை போல், மாநகராட்சிக்கு உட்பட்ட ஐந்து மண்டலங்களிலும் பறவைகள், விலங்குகளுக்கு குடிநீர் வசதி செய்ய வேண்டும்.

தமிழ்நாடு நகர்ப்புற வாழ்விட மேம்பாட்டு வாரியம் சார்பில் 10 இடங்களில் நடக்கும் அடுக்குமாடி குடியிருப்பு கட்டுமான பணியை விரைந்து முடிக்க வேண்டும்.

இவ்வாறு, அவர் அறிவுறுத்தினார்.

முன்னதாக, கொடிசியா அருகில், 2 ஏக்கரில் சிறுவர் சீர்திருத்தப்பள்ளி அமைப்பதற்கான இடம் தேர்வு, உக்கடம் - ஆத்துப்பாலம் மேம்பாலம், மாநகராட்சியுடன் இணைக்கப்பட்ட பகுதிகளில் பாதாள சாக்கடை பணி, ரத்தினபுரியில் அங்கன்வாடி மையம் கட்டுமானம் ஆகியவற்றை, கண்காணிப்பு அலுவலர் நேரில் ஆய்வு செய்து அறிவுரை வழங்கினார். அப்போது, மாநகராட்சி கமிஷனர் சிவகுரு பிரபாகரன் உடனிருந்தார்.