நடராஜ் கூறியதாவது:

தோட்டத்தில், 75 சென்ட் பரப்பளவில் டி.சி.ஹெச்., வகை பருத்தி சாகுபடி செய்து வருகிறோம். தற்போது, ஐந்து மாதம் நிறைவடைந்து, காய்கள் வெடிக்க துவங்கியுள்ள நிலையில், பருத்தி எடுப்பை துவங்கியுள்ளோம். இதுவரை, 150 கிலோ வரை பருத்தி எடுத்துள்ளோம். நாளொன்றுக்கு, 40 கிலோ வரை பருத்தி எடுக்கிறோம்.

பருத்திக்கு, கிணற்று நீரை பயன்படுத்தி, மாதம் இருமுறை பாசனம் செய்யப்படுகிறது. தற்போது வரை விதை, நடவு, உரம் மற்றும் இதர பராமரிப்பு என, 25 ஆயிரம் ரூபாய் செலவு ஏற்பட்டுள்ளது.

பருத்தி ஒரு கிலோ தற்போது 100 முதல் 130 ரூபாய் வரை விற்பனையாகிறது. இதே விலைக்கு விற்றால், விவசாயிகளுக்கு உரிய லாபம் கிடைக்கும். இவ்வாறு, கூறினார்.