விளையாட்டு துறை சார்பில் பொது மக்களிடையே உடற்தகுதி கலாசாரத்தை புகுத்தும் வண்ணம் 'அறிஞர் அண்ணா நெடுந்துார ஓட்டப்போட்டி' ஆண்டுதோறும் நடத்தப்படுகிறது. வரும், 5ம் தேதி தமிழ்நாடு விளையாட்டு மேம்பாட்டு ஆணையம்(எஸ்.டி.ஏ.டி.,) சார்பில் நேரு ஸ்டேடியம் அருகே காலை, 6:30 மணிக்கு ஓட்டம் துவங்கி எல்.ஐ.சி., அண்ணா சிலை வழியாக மீண்டும் ஸ்டேடியம் அடைகிறது.

இதில், 17 முதல், 25 வயதுக்குட்பட்ட ஆண்களுக்கு, 8 கி.மீ., மற்றும் பெண்களுக்கு, 5 கி.மீ., 25 வயதுக்கு மேற்பட்ட ஆண்களுக்கு, 10 கி.மீ., மற்றும் பெண்களுக்கு, 5 கி.மீ., ஓட்ட போட்டியும் நடத்தப்படுகிறது. பங்கேற்க விரும்புவோர் வயது சான்றிதழ், வங்கி கணக்கு புத்தக நகல், முகவரி(ஆதார்) சான்றிதழ்களை போட்டி நாள் வரை மாவட்ட விளையாட்டு அலுவலர் அலுவலகத்தில் சமர்ப்பிக்கலாம்.

முதல் பரிசாக ரூ.5,000, இரண்டாம் பரிசாக ரூ.3,000, மூன்றாம் பரிசாக ரூ.2,000 மற்றும் நான்கு முதல், 10 இடங்களில் வருபவர்களுக்கு ரூ.1,000 ரொக்கம் வழங்கப்படுகிறது. மேலும், விபரங்களுக்கு, 74017 03489 என்ற மொபைல் போன் எண்ணில் தொடர்புகொள்ளலாம் என, மாவட்ட விளையாட்டு அலுவலர் ஆனந்த் தெரிவித்துள்ளார்.