கோவை மாவட்ட வேளாண் இணை இயக்குநர் கிருஷ்ணவேணி வெளியிட்டுள்ள அறிக்கை:

பன்னாட்டு சந்தையில் டி.ஏ.பி., விலை அதிகமாக உள்ளதால் டி.ஏ.பி., உரத்துக்கு மாற்றாக கால்சியம், பாஸ்பரஸ், சல்பர் போன்ற கூடுதல் சத்துகள் அடங்கியுள்ள, சூப்பர் பாஸ்பேட் மற்றும் காம்ப்ளக்ஸ் உரங்களை (அம்மோனியம் பாஸ்பேட் சல்பேட் 20:20:0:1, என்.பி.கே., 15:15:15, என்.பி.கே., 16:16:16) பயன்படுத்தலாம்.

எண்ணெய் வித்துப் பயிர்களில் டி.ஏ.பி., உரத்துக்கு மாற்றாக சூப்பர் பாஸ்பேட் உரத்தைப் பயன்படுத்தும்போது, மகசூல் அதிகரித்து, எண்ணெய் அளவும் அதிகரிக்கிறது.

டி.ஏ.பி., உரமானது, மண்ணில் உப்பு நிலையை ஏற்படுத்துவதாக ஆய்வுகளில் கண்டறியப்பட்டுள்ளது. சூப்பர்பாஸ்பேட் உரம் டி.ஏ.பி., உரத்தை விட, குறைவாகவே உப்புத் தன்மையை ஏற்படுத்துகிறது. டி.ஏ.பி., 50 கிலோ ரூ. 1,350. சூப்பர் பாஸ்பேட் ரூ. 610. அம்மோனியம் பாஸ்பேட் ரூ.1220க்கு விற்பனையாகிறது. எனவே, டி.ஏ.பி.க்கு மாற்றாக சூப்பர் பாஸ்பேட் மற்றும் காம்ப்ளக்ஸ் உரங்களை விவசாயிகள் பயன்படுத்தலாம்.

இவ்வாறு, அறிக்கையில் தெரிவிக்கப்பட்டுள்ளது.