கிணத்துக்கடவு, எஸ்.எம்.பி., நகரில் அன்னபூரணி அம்மை உடனமர் சோற்றுத்துறைநாதர் கோவில் உள்ளது. இக்கோவிலுக்கு அருகிலுள்ள கல்லாங்காட்டுப்புதுார், சிங்கராம்பாளையம், லட்சுமிநகர், கொண்டம்பட்டி மற்றும் சுற்றுப்புற பகுதிகளிலிருந்து ஏராளமான மக்கள் வருகை தருவர்.

கோவிலில்,திருக்குட நன்னீராட்டு விழா நிகழ்ச்சிகள், 28ம் தேதி துவங்குகிறது. அன்று, காலை, 5:00 மணிக்கு, திருவிளக்கு வழிபாடு, புனித நீர் வழிபாடு, விநாயகர், நிலத்தேவர் வழிபாடு நடக்கிறது. இரவு 7:30 மணிக்கு, வேள்வி நிறைவு, திருமுறை விண்ணப்பம், பேரொளி வழிபாடு நடக்கிறது.

வரும், 29ம் தேதி, காலை ஐங்கரன் வேள்வி வழிபாடு, மண்ணெடுத்தல், முளையிடுதல், காப்பணிவித்தல் நடக்கிறது. மாலையில், முதற்கால வேள்வி நடக்கிறது. 30ம் தேதி, அதிகாலை 4:30 மணிக்கு, திருப்பள்ளியெழுச்சி, சுற்று பூஜைகள் நடக்கிறது. காலை 7:00 மணிக்கு, இரண்டாம் கால வேள்வி, 9:00 மணிக்கு திருக்கலசப் புறப்பாடு, 9:30 மணிக்கு விமானம் மற்றும் மூலமூர்த்திகளுக்கு திருக்குட நன்னீராட்டு நடக்கிறது. மதியம் 12:00 மணிக்கு, அன்னதானம் நடக்கிறது. மாலையில், சுவாமி திருக்கல்யாணம் உற்சவம், இரவு சுவாமி திருவீதி உலா நடக்கிறது.