நீலகிரி மற்றும் கொடைக்கானலுக்கு செல்ல, இ-பாஸ் முறை கடந்த ஆண்டு மே 7 முதல் அமலில் உள்ளது. நேற்று முதல் இம்மாவட்டங்களுக்கு தினமும் 6,000 வாகனங்கள், வார இறுதி நாட்களில் 8,000 வாகனங்கள் மட்டுமே இ-பாஸ் முறையில் அனுமதிக்கப்பட வேண்டும் என நீதிமன்றம் உத்தரவிட்டது.

நீலகிரி மாவட்டத்திற்குள் செல்லும் 12 வழித்தடங்களிலும் இ-பாஸ் சோதனை நேற்று தீவிரமாக நடந்தது.

கோவையில் இருந்து நீலகிரி செல்லக்கூடிய சாலையில், மேட்டுப்பாளையம் அருகே கல்லார் துாரிப்பாலத்தில், இ--பாஸ் சோதனை சாவடி அமைக்கப்பட்டுள்ளது. இதில் நீலகிரி மாவட்டத்திற்கு செல்லக்கூடிய வாகனங்கள் இ--பாஸ் பெற்று இருந்தால் மட்டுமே அனுமதிக்கப்பட்டன.

இதனால், சோதனை சாவடியில் பெருங்கூட்டம் கூடியது.

சர்வர் கோளாறு, வருவாய் துறை ஊழியர்கள் பற்றாக்குறை போன்றவற்றால், கல்லார் பகுதியில் கடும் போக்குவரத்து நெரிசல் ஏற்பட்டது. சுற்றுலா பயணியர், இ--பாஸ் சோதனை அலுவலர்கள், போலீசார் என அனைவரும், கிழிந்து தொங்கும் ஓலை மேற்கூரைக்கு கீழே நின்று தான் தங்களது பணிகளை செய்கின்றனர்.

உடைந்த கம்புகள், கிழிந்த ஓலைகள் என சரியும் நிலையில் உள்ள சோதனை சாவடியின் மேற்கூரையை கண்டு சுற்றுலா பயணியர் அச்சமடைந்தனர்.

ஆட்கள் பற்றாக்குறை

வருவாய் துறையினர் சார்பில், இ--பாஸ் செக் செய்வது, பிளாஸ்டிக் பாட்டில் பறிமுதல் செய்வது, பசுமை வரி வசூலிப்பது என இப்பணிகளுக்கு 5 முதல் 7 பேர் வரை மட்டுமே உள்ளனர். தேவையான ஊழியர்கள் இல்லாததால் இ--பாஸ் சோதனை பணிகளில் தாமதம் ஏற்படுகிறது.