மேலத்திருப்பதி என்று அழைக்கப்படும், 400 ஆண்டு பழமையான மொண்டிபாளையம் வெங்கடேச பெருமாள் கோவிலில், 58ம் ஆண்டு தேர்த் திருவிழா துவங்கியது.

நேற்று முன்தினம் இரவு நகர சோதனை, வாஸ்து சாந்தி, அங்குரார்ப்பனம் நடந்தது. நேற்று காலை 6:00 மணிக்கு, பெருமாளுக்கு திருகாப்பு கட்டப்பட்டது. காலை 8:00 மணிக்கு வேள்வி பூஜையும் கொடியேற்றமும் நடந்தது. கோவில் செயல் அலுவலர், பரம்பரை அறங்காவலர்கள் மற்றும் பக்தர்கள் பங்கேற்றனர். பெருமாள் அன்ன வாகனத்தில் உலா வந்து அருள் பாலித்தார்.

வரும் 7ம் தேதி வரை, தினமும் காலை 7:00 மணிக்கும், இரவு 8:00 மணிக்கும் பெருமாள் வெவ்வேறு வாகனங்களில் திருவீதியுலா வந்து அருள் பாலிக்கிறார்.

வரும் 8ம் தேதி காலை 10:00 மணிக்கு, அம்மன் அழைத்தலும், இதையடுத்து, சுவாமி திருக்கல்யாண உற்சவமும் நடக்கிறது. வரும் 9ம் தேதி இரவு யானை வாகனத்தில் பெருமாள் திருவீதி உலா நடக்கிறது.

வரும் 10ம் தேதி காலை 8:00 மணிக்கு பெருமாள் தேருக்கு எழுந்தருகிறார். காலை 11:00 மணிக்கு தேரோட்டம் நடக்கிறது. வரும் 11ம் தேதி இரவு பரிவேட்டையும், வரும் 12ம் தேதி இரவு தெப்ப தேரோட்டமும் நடக்கிறது.