தர்மபுரி மாவட்டம், நல்லம்பள்ளி ஒன்றியம், பாலஜங்கமனஹள்ளி பஞ்., உட்பட்ட முத்துகவுண்டன் கொட்டாயில், 60 குடும்பத்தினர் வசிக்கின்றனர். அவர்களின் குடிநீர் தேவைக்கு, உள்ளுர் நீராதாரமான ஆழ்துளை கிணறு மற்றும் ஒகேனக்கல் கூட்டு குடிநீர் வழங்கப்பட்டு வந்தது. இதில் கடந்த, 5 ஆண்டுக்கு முன், ஆழ்துளை குடிநீர் இணைப்பு துண்டிக்கப்பட்டதால், ஒகேனக்கல் குடிநீரை மட்டும் நம்பியிருந்தனர்.

கடந்த, 2 மாதமாக ஒகேனக்கல் குடிநீரும் சீராக வழங்கவில்லை. அதிகாரிகளிடம் புகார் தெரிவித்தும் நடவடிக்கை எடுக்காததால், ஆத்திரமடைந்த மக்கள், காலி குடங்களுடன் நேற்று காலை, 8:00 மணிக்கு ஈச்சம்பட்டி - நல்லம்பள்ளி சாலையில், அவ்வழியாக வந்த வழிதடம் எண், 5ஏ அரசு டவுன் பஸ்சை சிறைபிடித்து, மறியலில் ஈடுபட்டனர். அங்கு வந்த பாலஜங்கமனஹள்ளி பஞ்., செயலர் ருக்குமணி, குடிநீர் சீராக வழங்க நடவடிக்கை எடுப்பதாக உறுதியளித்ததால், பொதுமக்கள் மறியலை கைவிட்டு, கலைந்து சென்றனர்.