பழநி முருகன் கோயில் நிர்வாகத்திற்கு உட்பட்ட கிழக்கு ரத வீதியில் உள்ள மாரியம்மன் கோயிலில் மாசி திருவிழா பிப்.21ல் முகூர்த்தக்கால் நடுதல் உடன் துவங்கியது. பிப்.,25 ல் கம்பம் நடுதல், மார்ச் 4 ல் கொடியேற்றம், மார்ச் 11 ல் திருக்கல்யாணம் நடைபெற்றது. இதை தொடர்ந்து நேற்று மாலை 4:00 மணிக்கு மாரியம்மன் திருத்தேரில் எழுந்தருள 4:30 மணிக்கு பக்தர்களின் 'ஓம் சக்தி பராசக்தி' கோஷத்துடன் தேரோட்டம் நடைபெற்றது. கோயில் யானை கஸ்துாரி தேரின் பின்னால் சென்றது. 6:00 மணிக்கு தேர் நிலைக்கு வந்தது. சாரல் மழையிலும் திரளான பக்தர்கள் கலந்து கொண்டனர். இன்று இரவு 10:00 மணிக்கு கொடியிறக்குதலுடன் திருவிழா நிறைவடைகிறது.