இந்நிலையில் ஒரே கட்டடத்தில் ஒன்றுக்கு மேற்பட்ட இணைப்பு மூலம் முறைகேடு நடப்பதை தடுக்க முறைகேடாக பெறப்பட்ட இணைப்புகளை ஒன்றிணைக்க சில மாதங்களுக்கு முன் அரசு உத்தரவிட்டது. இதற்காக பல்வேறு வழிகாட்டு நெறிமுறைகளும் வெளியிடப்பட்டது. ஒரே கட்டடமாக இருப்பினும் தரைதளம், மேல்த்தளம், இரு கட்டடங்களுக்கு தனித்தனி நுழைவாயில், தனித்தனி குடும்பங்கள் வசிக்கும் இடம் ஆகியவற்றில் வெவ்வேறு மின் இணைப்புகளை பயன்படுத்தி கொள்ள அனுமதிக்கப்பட்டது. ஆனால் இது தொடர்பாக ஆய்வு மேற்கொண்ட மின்வாரிய அலுவலர்கள் பலர் வழிகாட்டுதல் நெறிமுறைகளை முறையாக பின்பற்றவில்லை என புகார் எழுந்துள்ளது. பல இடங்களில் தனித்தனி தளங்கள், குடியிருப்புகள் கொண்ட கட்டடங்களில் வீட்டு மின்இணைப்புகளை ஒன்றிணைத்து உள்ளனர். தனி குடும்பங்கள், வாடகைதாரர்கள் என ஆதார் விபரங்கள் வழங்கப்பட்டிருந்த போதும் அவற்றை ஒரே இணைப்பில் மாற்றிய அவலம் அரங்கேறி உள்ளது.

இது போன்ற குளறுபடிகளால் வீட்டு உபயோக மின் பயன்பாட்டிற்கும் வணிக அளவில் மின் கட்டணத்தை செலுத்த வேண்டிய நிலைக்கு தள்ளப்பட்டுள்ளனர்.

பாதிப்படைந்த பலர் மின்வாரிய அதிகாரியிடம் பலமுறை முறையிட்டும் தீர்வு கிடைக்காமல் அலைக்கழிக்கப்பட்டு வருகின்றனர். சில இடங்களில் மின் ஊழியர்கள், அலுவலர்கள், ஒப்பந்த நிலை ஊழியர்கள் இப்பிரச்னையை சரி செய்து தருவதாக கூறி முறைகேடான வசூலில் ஈடுபட்டுள்ளதால் அதிருப்தி அதிகரித்து வருகிறது.மாவட்ட நிர்வாகம் மின் வாரிய செயல்பாடுகளில் நிலவும் குளறுபடிகளை களைய நடவடிக்கை எடுக்க வேண்டும்.