லோக்சபா தேர்தல் பிரசார பணிகளை முடித்து ஓய்வுக்கு இன்று முதல் ஒரு வார காலத்திற்கு கொடைக்கானலில் தங்குவதற்கு தமிழக முதல்வர் ஸ்டாலின் வருகிறார். இந்த சமயத்தில் மாவட்டத்தின் தேவைகளை முதல்வரின் கவனத்திற்கு கொண்டு சென்றால் தீர்வு கிடைக்குமென மாவட்ட மக்கள் எதிர்பார்த்து உள்ளனர். மாவட்டத்தில் பூ விவசாயம் பிரதானமாக இருப்பதால் தற்பொழுது பூவில் இருந்து வாசனை திரவியம் தயாரிக்கப்படும் மூலப் பொருளான 'கான்கிரீட்' என்ற திட படிமம் மட்டுமே நிலக்கோட்டை பகுதியில் தயாரிக்கப்படுகிறது. இதனை வாசனை திரவியமாக மாற்ற மும்பைக்கு செல்ல வேண்டி இருப்பதால் அதிக பணம்,நேரம் செலவாகிறது. செலவுகளை குறைக்க விவசாயிகளின் நீண்ட நாள் கோரிக்கையான வாசனை திரவிய ஆலையை நிலக்கோட்டை சிப்காட்டில் துவங்க வேண்டும். அதேபோன்று முருங்கை, வாழை விவசாயமும் அதிக ஏக்கர் பரப்பளவில் சாகுபடி செய்யப்படுவதால் விவசாயிகளின் ஏகத்தை போக்கும் வண்ணம் வாரியம் அமைத்திட வேண்டும்.