கோவிலுார் ஊராட்சி செல்லக்குட்டியூரில் 6 நீர்த்தொட்டிகள் மூலம் குடிநீர் வினியோகம் நடக்கிறது. அருகில் சிக்கையகவுண்டன்குளத்தில் நிறுவிய 2 ஆழ்துளை கிணறுகள், காவிரி குடிநீர் திட்டம் மூலம் வினியோகம் நடந்தது.

இந்நிலையில் உள்ளூர் நீர் ஆதாரங்கள் வறண்டு போக, காவிரி நீரும் கிடைக்காமல் கடந்த சில வாரங்களாக இப்பகுதி மக்கள் அவதிப்பட்டனர். அதிகாரிகளிடம் புகார் செய்தும் தீர்வு கிடைக்கவில்லை.

அதிருப்தியில் இருந்த மக்கள் காலி குடங்களுடன் தோப்புப்பட்டி வந்து திண்டுக்கல் குஜிலியம்பாறை மாநில நெடுஞ்சாலையில் மறியல் போராட்டம் நடத்தினர். ஒருமணி நேரம் போக்குவரத்து பாதித்தது.

வேடசந்துார் பி.டி.ஓ., கற்பகம், எரியோடு இன்ஸ்பெக்டர் வினோதா பேச்சுவார்த்தை நடத்தினர். குடிநீர் பிரச்னைக்கு தீர்வு காணப்படும் எனக்கூறி போராட்டத்தை கைவிட செய்தனர்.