காஞ்சிபுரத்தில் தேரோடும் நான்கு ராஜ வீதிகளில் ஒன்றான செங்கழுநீரோடை வீதியில் காய்கறி மார்க்கெட், உணவகம், அரசு டாஸ்மாக், நகை, பல சரக்கு மளிகை பொருட்கள் உள்ளிட்ட பல்வேறு கடைகள் இயங்கி வருகின்றன.

வாகன போக்குவரத்தும், பொதுமக்கள் நடமாட்டமும் நிறைந்த இச்சாலையில், கடந்த மாதம் பாதாள சாக்கடை பைப்பில் உடைப்பு ஏற்பட்டு சாலையில் கழிவுநீர் வழிந்தோடியது.

இதையடுத்து மாநகராட்சி சார்பில், கழிவுநீர் எந்த இடத்தில் கசிவு ஏற்பட்டுள்ளது என்பதை தெரிந்து கொள்வதற்காக 30 மீட்டருக்கு மேல் சாலையில் ஆங்காங்கே பள்ளம் தோண்டப்பட்டு சேதப்படுத்தப்பட்டது.

ஆனால், கழிவுநீர் உடைப்பு சீரமைத்தபின், சேதமான சாலையை மாநகராட்சி நிர்வாகம் மீண்டும் பழையபடி சீரமைக்கவில்லை. இதனால், இச்சாலையில் செல்லும் இருசக்கர வாகன ஓட்டிகளும், பாதசாரிகளும் நிலைதடுமாறி விழுந்து காயமடைகின்றனர். இதனால், அடிக்கடி விபத்து ஏற்படும் சூழல் உள்ளது.

மேலும், விபத்தை தடுக்கும் வகையில், பல்வேறு கோவில்களின் தேரோடும் வீதியான செங்கழுநீரோடை வீதியை, முறையாக சீரமைக்க, மாநகராட்சி நிர்வாகம் நடவடிக்கை எடுக்க வேண்டும் என, வாகன ஓட்டிகள் வலியுறுத்தி உள்ளனர்.