கரூர் மாநகராட்சி கவுன்சிலர்கள் சாதாரண, அவசர கூட்டம் நேற்று நடந்தது. மேயர் கவிதா தலைமை வகித்தார். முதலில், கரூர் த.வெ.க., பிரசார கூட்ட நெரிசலில் சிக்கி உயிரிழந்த, 41 பேருக்கு மவுன அஞ்சலி செலுத்தப்பட்டது. பின், விவாதத்தில் கவுன்சிலர்கள் பேசிய விபரம்:

தினேஷ்குமார் (அ.தி.மு.க., கவுன்சிலர்): கரூர் பழைய பஸ் ஸ்டாண்டில் உள்ள மாநகராட்சி சொந்தமான கடைகளுக்கு, வைப்பு தொகை குறைக்கப்பட்டுள்ளது. இது, ஏற்கனவே கடை நடத்தி வருபவர்களுக்கு பொருந்துமா. அவர்களின் வைப்பு தொகை திருப்பி கொடுக்கப்படுமா.

மேயர் கவிதா: புதிதாக டெண்டர் விடும் கடைகளுக்கு மட்டுமே வைப்பு தொகை குறைக்கப்பட்டுள்ளது. மற்றவர்களுக்கு பொருந்தாது.

ராஜா (3ம் மண்டல தலைவர் தி.மு.க.,): கரூர் மாநகராட்சி பகுதியில் நாய்கள் தொல்லை அதிகரித்துள்ளது. கட்டுப்படுத்த நடவடிக்கை உண்டா.

மேயர் கவிதா: அரசு காலனியில் நாய்களுக்கு கு.க., செய்ய கருத்தடை மையம் ஏற்படுத்தப்பட்டுள்ளது. மேலும், மாநகராட்சி பணியாளர்களுக்கு நாய்களை பிடிக்க பயிற்சி அளிக்கப்பட்டுள்ளது.

கமிஷனர் சுதா: உச்ச நீதிமன்றம் உத்தரவின்படி, நோய் பாதிக்கப்பட்ட நாய்களை மட்டுமே பிடித்து அப்புறப்படுத்த முடியும். மற்ற நாய்களுக்கு கு.க., மட்டுமே செய்ய முடியும்.

இவ்வாறு விவாதம் நடந்தது.

சாதாரண கூட்டத்தில், 59 தீர்மானங்களும், அவசர கூட்டத்தில், 9 தீர்மானங்களும் நிறைவேற்றப்பட்டன