கரூர், கரூர் மாநகராட்சியில், 8.08 கோடி ரூபாய் மதிப்பில், 103 புதிய வளர்ச்சி திட்டப் பணிகளை, கரூர் எம்.எல்.ஏ., செந்தில் பாலாஜி தொடங்கியும், முடிவுற்ற பணிகளை திறந்தும் வைத்தார்.கரூர் மாநகராட்சிக்குட்பட்ட பகுதிகளில், புதிய வளர்ச்சி திட்டப் பணிகளுக்கான பூமி பூஜை நேற்று நடந்தது. கலெக்டர் தங்கவேல் தலைமை வகித்தார். எம்.எல்.ஏ., செந்தில் பாலாஜி புதிய வளர்ச்சி திட்டப் பணிகளை பூமி பூஜை செய்து தொடங்கி வைத்தும், முடிவுற்ற பணிகளை திறந்தும் வைத்தார். அதில், கரூர் மாநகராட்சி மண்டல, 3, 4வது மண்டலங்களுக்குட்பட்ட வார்டுகளில் புதிதாக சிமென்ட் சாலை, மழைநீர் வடிகால், தார்ச்சாலை மேம்படுத்தும் பணி, பேவர் பிளாக் அமைக்கும் பணி, மூலக்காட்டானுார் நீருந்து நிலையத்தில் வட்டக்கிணறு துார்வாருதல், நீர்மூழ்கி பம்பு செட் உபகரணங்கள் வினியோகம் மற்றும் சோதனை செய்து இயக்குதல் பணியை பூமி பூஜை செய்து செந்தில் பாலாஜி தொடங்கி வைத்தார்.