குடும்ப அட்டைதாரர்கள் ஒவ்வொருவருக்கும், 5 கிலோ இலவச அரிசி வழங்கப்படுகிறது. சர்க்கரை, சமையல் எண்ணை, துவரம் பருப்பு போன்றவை மானிய விலையில் வழங்கப்படுகிறது.

இலவச அரிசிக்கு பதிலாக, 2 கிலோ கோதுமை பெறலாம். கிருஷ்ணகிரி பழையபேட்டை நேதாஜி சாலையிலுள்ள ரேஷன் கடையில், 700க்கும் மேற்பட்ட குடும்ப அட்டைதாரர்கள் உள்ளனர்.

இங்கு நேற்று முன்தினம் வழங்கிய கோதுமையில், 1 கிலோவிற்கு கால் கிலோ குச்சி மற்றும் கழிவுகள் இருந்ததால், மக்கள் அதிருப்தி அடைந்தனர்; கழிவுகளை சுத்தம் செய்ய மிகவும் சிரமத்திற்கு ஆளாகினர்.

இதுபோல, சில ரேஷன் கடைகளில் வழங்கப்பட்ட கோதுமையில் கழிவுகள் இருந்ததாக மக்கள் தெரிவித்தனர். எனவே, வரும் காலங்களில் சுத்தமான கோதுமையை வழங்க, அப்பகுதி மக்கள் கோரிக்கை விடுத்துள்ளனர்.