இரண்டாம் நாளான நேற்று நெதர்லாந்து அணியுடன் இங்கிலாந்து அணி ஆட்டம் காலை, 9:00 மணிக்கு துவங்கியது.

மதுரையில் மழை பெய்தாலும் அதை பொருட்படுத்தாமல் காலை, 8:00 மணி முதலே ரசிகர்கள் மைதானத்திற்கு வரத்துவங்கினர்.

இருசக்கர வாகனத்திற்கான பார்க்கிங் செய்ய, பல்கலை கல்லுாரி வளாகம் தேர்வு செய்யப்பட்டிருந்தது. அங்கிருந்து கேட் 6க்கு வர 900 மீ., நடந்து வர வேண்டும் என்பதால் பெரியவர்கள் நடக்க முடியாமல் சிரமப்பட்டனர்.

நடமாடும் கழிப்பறைகளில் சரிவர சுத்தம் செய்யாமல் இருந்ததால், அவசரத்திற்கு வந்தவர்கள் முகம் சுளித்து திரும்பினர். ஆப்பில் டிக்கெட் புக் செய்தவர்கள் மட்டுமே அனுமதிக்கப்பட்டனர்.

பரமக்குடியை சேர்ந்த கதிரேசன் கூறுகையில், “நான் பரமக்குடியில் மளிகை கடை வைத்துள்ளேன். ஒன்பதாம் வகுப்பு படிக்கும் என் மகள் பரம ஹாக்கி ரசிகை. மதுரையில் முதன்முதலாக ஹாக்கி உலகக்கோப்பை நடப்பதால் காலை, 5:00 மணிக்கே என் மகளுடன் கிளம்பி வந்தேன்.

''ஆனால் இங்கு ஆன்லைனில் புக் செய்தவர்களை தவிர மற்றவர்களுக்கு அனுமதியில்லை என்கின்றனர். மேட்ச் பார்க்காமல் ஊர் திரும்புவது ஏமாற்றம்,” என்றார்.

ஆன்லைனில் புக் செய்து உள்ளே சென்ற ரசிகர்கள் தற்காலிக கேலரிகள் செல்வதற்கு சேற்றில் கால் வைத்து இருக்கைகளுக்கு செல்லும் நிலை உள்ளது.

மைதானத்தை சுற்றி பார்வையாளர்களுக்கு முன், 30 அடிக்கு வலைப்பின்னல் கம்பிகளால் ஆன தடுப்புகள் இருந்ததால், கேலரியின் மேல் வரிசையில் இருந்தாலும் தெளிவாக பார்க்க முடியவில்லை.

சியர் கேர்ள்ஸ், தமிழ் பாடல்கள் என ரசிகர்களை கவர ஏற்பாடுகள் செய்திருந்தாலும், தற்காலிக கேலரிகளில் பகுதியளவு இருக்கைகள் காலியாக இருந்தன. இதற்கு பதிலாக ஆன்லைன் டிக்கெட் இல்லாதவர்களையாவது உள்ளே அனுமதித்து இருக்கலாம்.

எஞ்சிய ஆட்டங்களிலாவது ஆன்லைனில் புக் செய்யாதவர்கள் பார்ப்பதற்கு ஏதுவாக டிக்கெட் கவுன்டர்கள் அமைத்து தர வேண்டும் என, ஹாக்கி ஆர்வலர்கள் கோரிக்கை வைத்துள்ளனர்.