ஊட்டி, திண்டுக்கல் மாவட்டம் கொடைக்காலுக்கு அதிக வாகனங்கள் வந்து செல்வதால் சுற்றுச்சூழல் பாதுகாப்பை கருத்தில் கொண்டு, கோர்ட் உத்தரவுப்படி, தினமும் எத்தனை வாகனங்கள், இப்பகுதிக்கு வந்து செல்கின்றன என்பதை கண்டறிய, கடந்த மே, 7ம் தேதி முதல் இ--பாஸ் முறையை நடைமுறைப்படுத்தி உள்ளனர்.

இந்நிலையில், கோடையில் வாகன நெரிசலை கட்டுப்படுத்த, ஏப்.,1 முதல், ஊட்டிக்கு வார நாட்களில், 6,000 வாகனங்களும்; இறுதி நாட்களில், 8,000 வாகனங்கள் அனுமதிக்க ஐகோர்ட் உத்தரவிட்டுள்ளது. இந்த உத்தரவை ஏப்., 1 முதல் அமல்படுத்தி உள்ளனர்.

இந்நிலையில், கூடலுாரை ஒட்டிய, தமிழக கேரளா எல்லைகளில் உள்ள சோதனை சாவடிகளில், ஊட்டிக்கு வரும் வெளிமாநிலங்கள் வாகனங்களுக்கு இ-பாஸ் சோதனையை, தீவிரப்படுத்தி உள்ளனர்.

நேற்று முன்தினம், இப்பணியில் ஈடுபட்ட ஊழியர்களிடம், இ--பாஸ் எடுத்து வராத சுற்றுலா பயணிகள், சிலர் வாக்குவாதத்தில் ஈடுபட்டனர். இதனால், தமிழக-கேரள எல்லை களில் உள்ள சோதனை சாவடிகளில், போலீசார் பாதுகாப்பு பணியில் ஈடுபட்டு வருவதுடன், சுற்றுலா வாகனத்தின் பதிவு எண், வாகனத்தின் பெயர், இ--பாஸ் எண், பயணிகளின் எண்ணிக்கை பதிவு செய்து வருகின்றனர்.

இந்நிலையில், நாடுகாணி, தொரப்பள்ளி சோதனை பகுதியில், நேற்று இ--பாஸ் பதிவு செய்ய தாமதம் ஏற்பட்டதால் சுற்றுலா பயணிகள் சிரமத்துக்கு ஆளாகினர்.

ஊழியர்கள் கூறுகையில், 'கம்ப்யூட்டர் சர்வரில் ஏற்பட்ட பிரச்னை காரணமாக, சிலருக்கு இப்பிரச்னை ஏற்பட்டது. எனினும், சிறிது நேரத்தில் அவர்களுக்கு இ--பாஸ் கிடைத்தது,' என்றனர்.