புதுக்கோட்டை மாவட்டம், பேயாடிப்பட்டியில் உள்ள, பொது வினியோக அங்காடி கட்டடம் சிதலமடைந்தது. மக்கள் கோரிக்கையை ஏற்று, கந்தர்வக்கோட்டை தொகுதி எம்.எல்.ஏ., தொகுதி மேம்பாட்டு திட்ட நிதியிலிருந்து, 13 லட்சம் ரூபாய் மதிப்பீட்டில், புதிய அங்காடி கட்டடம் கட்டப்பட்டது.

இரண்டு வாரங்களுக்கு முன், தமிழக முதல்வர் காணொளி வாயிலாக, திறந்து வைத்தார். இந்த கட்டடம் கட்டப்பட்ட இடம் உரிய முறையில் அளவீடு செய்யாமல், அப்பகுதியை சேர்ந்த ரஹிம் என்பவருக்கு சொந்தமான பட்டா இடத்தில் கட்டப்பட்டுள்ளது.

இந்த அங்காடி கட்டடத்தை, அவர் கம்பி வேலியிட்டு, யாரும் செல்லாதவாறு, பூட்டு போட்டு பூட்டியுள்ளார்.

அங்காடி கட்டடத்தை தனிநபர் ஒருவர் பயன்படுத்தி வருவதால், பொதுமக்கள் பயன்படுத்த முடியாத நிலை ஏற்பட்டுள்ளது.

அப்பகுதி மக்கள் கூறுகையில், 'அங்காடிக்கு கட்டடம் கட்டப்பட்டும், அதை மக்கள் பயன்பாட்டிற்கு கொண்டுவர முடியாத நிலை உள்ளது. எனவே மாவட்ட நிர்வாகம் நடவடிக்கை மேற்கொண்டு, மக்கள் பயன்பாட்டிற்கு பொது வினியோக அங்காடியை கொண்டு வர வேண்டும்' என்றனர்.