ராமேஸ்வரத்தில் இருந்து மதுரைக்கு தினமும் அதிகாலை 5:45, காலை 11:40, மாலை 6:15 மணிக்கும், மறு மார்க்கத்தில் மதுரையில் இருந்து காலை 6:50, மதியம் 1:50, மாலை 6:15 மணிக்கும் பாசஞ்சர் ரயில்கள் இயக்கப்படுகின்றன. வெளி மாநிலங்கள், வெளி மாவட்டங்களில் இருந்து ராமேஸ்வரத்திற்கு வருவோர் பெரும்பாலும் மதுரை வந்து ரயில்களில் பயணிக்கின்றனர். ஆனால் மூன்று ரயில்கள் மட்டுமே இருப்பதால் அவர்கள் பெரும்பாலும் பஸ்களில் அதிக கட்டணம் செலுத்தி பயணிக்கின்றனர்.

மதுரையில் இருந்து ராமேஸ்வரத்திற்கு பகல் மற்றும் இரவில் கூடுதல் ரயில்கள் சேவை இல்லாதது பயணிகளிடம் ஏமாற்றத்தை ஏற்படுத்தியுள்ளது. ராமநாதபுரம்--ராமேஸ்வரம் இடையே மின்மயமாக்கல் பணி நடந்து வந்ததால் ரயில்கள் டீசல் இன்ஜின் கொண்டு இயக்கப்பட்டன. இதனால் இந்த வழித்திடத்தில் அதிகமான ரயில்கள் இயக்க முடியாத சூழல் இருந்தது.

தற்போது மின்மயமாக்கல் பணி முடிவடைந்து மின் இன்ஜின்கள் மூலம் ரயில்கள் இயக்கப்படுகின்றன.

எனவே மதுரை- - ராமேஸ்வரம் இடையே பயணிகள் வசதிக்காக மெமு ரயில்களை இயக்க வேண்டும் என பயணிகள் கோரிக்கை விடுத்துள்ளனர்.

இதுகுறித்து பயணிகள் கூறியதாவது: ராமேஸ்வரத்தில் இருந்து காலை 7:00 மணி, மதுரையில் இருந்து இரவு 8:00 மணிக்கு கூடுதல் பயணிகள் ரயில்களை இயக்கினால் பணிக்கு செல்வோருக்கு வசதியாக இருக்கும்.

அதே போல் சென்னை--புதுச்சேரி, கோவை- -மேட்டுப்பாளையம் போன்ற இரு முக்கிய நகரங்களுக்கு இடையே இயக்கப்படும் அதிவேக மெமு ரயில்களை மதுரை--ராமேஸ்வரம் இடையே இயக்க ரயில்வே நிர்வாகம் முன்வர வேண்டும்.

இதனால் பயண நேரம் குறைவதுடன் கூடுதல் ரயில்கள் இயக்க முடியும் என்றனர்.

ரயில்வே அதிகாரிகள் கூறியதாவது: ராமேஸ்வரத்தில் அதிக அளவிலான ரயில்களை பராமரிக்க போதிய இடவசதி இல்லை.

புதிய பணிமனை அமைப்பதற்கான ஆய்வு நடக்கிறது. அதற்கு பின் ராமேஸ்வரத்திற்கு கூடுதல் ரயில்கள் சேவை வழங்கப்படும் என்றனர்.