சிவகங்கை மாவட்டத்தில் 2 மாதங்களாக மேலாக கனமழை பெய்தது.

இதன் மூலம் சிவகங்கை மாவட்டம் வழியாக செல்லும் மணிமுத்தாறு, வைகை, கிருதுமால் நதி, பரளையாறு, உப்பாறு, நாட்டார் ஆறு, நாட்டார் கால்வாய், சருகணியாறு, கோட்டைகரையாறு, பாலாற்றில் மழை நீர் பெருக்கெடுத்து ஓடுகிறது. இந்த ஆறுகளை நம்பியே பொதுப்பணித்துறையின் கீழ் உள்ள 959 கண்மாய்களிலும் மழை நீர் சேகரமாகின்றன. இந்த கண்மாய் நீரினை நம்பியே விவசாயிகள் நெல் நடவு செய்துள்ளனர்.

நிரம்பி வழியுது 328 கண்மாய்கள்

மழை நீர் கண்மாய்களில் சேகரமாவதன் மூலம் நேற்றைய (டிச., 17) நிலவரப்படி 328 கண்மாய்கள் முழுவதும் நிரம்பி மறுகால் பாய்கின்றன. 344 கண்மாய்களில் 99 சதவீதமும், 184 கண்மாய்களில் 51 முதல் 75 சதவீதமும், 87 கண்மாய்களில் 26 முதல் 50 சதவீதம் வரை மழை நீர் சேகரமாகியுள்ளது.

மாவட்ட அளவில் 16 கண்மாய்களில் மட்டுமே 25 சதவீதம் வரை மழைநீர் சேகரமாகியுள்ளன. இந்த ஆண்டு தொடர் மழை காரணமாக வைகை ஆற்றில் வெள்ள நீர் ஓடுவதால், சிவகங்கை, விருதுநகர் மாவட்ட கூட்டு குடிநீர் திட்டங்களுக்கு தடையின்றி தண்ணீர் கிடைக்கும் நிலை ஏற்பட்டுள்ளது.

அதே போன்று கண்மாய் நீரினை நம்பி நெல் நடவு செய்துள்ள விவசாயிகள் ஒரு போக நெல் அறுவடை செய்துவிட முடியும் என்ற நம்பிக்கையில் விவசாய பணிகளில் ஆர்வமுடன் ஈடுபட்டு வருகின்றனர்.

ஆறுகளில் மழை நீர் வெள்ளம்போல் செல்வதால், ஏரியூர், குமாரபட்டி, சருகணி ஆறு உள்ளிட்ட அனைத்து ஆறுகளில் உள்ள மதகணைகளில் மழை நீர் அருவி போல் கொட்டுவதால், சுற்றுலா பயணிகள் குளித்து மகிழ்கின்றனர்.