இளையான்குடி பேரூராட்சி கூட்டம் தலைவர் நஜூமுதீன் தலைமையில் நடந்தது. துணை தலைவர் இப்ராஹிம் முன்னிலை வகித்தார்.

துாய்மை ஆய்வாளர் தங்கதுரை வரவு,செலவு கணக்குகள் மற்றும் தீர்மானங்களை வாசித்தார்.

கூட்டத்தில் நடந்த விவாதம்:

அ.தி.மு.க., கவுன்சிலர் நாகூர் மீரா: பேரூராட்சி கூட்டத்தில் அனைத்து அரசு அதிகாரிகளும் பங்கேற்க நடவடிக்கை எடுத்தால் கவுன்சிலர்கள் கூறும் குறைகளை நிவர்த்தி செய்ய ஏதுவாக இருக்கும்.பழைய எம்.எல்.ஏ அலுவலக கட்டட வளாகத்தில் ஆரம்ப சுகாதார நிலையம் கட்டுவதற்கு நடவடிக்கை எடுக்க வேண்டும்.

அல் அமீன், காங்., கவுன்சிலர்: ரசூலாசமுத்திரத்தில் புதிதாக கட்டப்பட்ட சமுதாயக்கூடத்தில் தண்ணீர் வசதி இல்லாத காரணத்தினால் போர்வெல் அமைக்கும் வரை தற்காலிகமாக குடிநீர் இணைப்பு வழங்க நடவடிக்கை எடுக்க வேண்டும்.

ராஜவேலு, சுயேச்சை கவுன்சிலர்: பல கோடி ரூபாய் செலவில் கட்டப்பட்டு வெறிச்சோடி கிடக்கும் புதிய பஸ் ஸ்டாண்டிற்கு அனைத்து பஸ்களும் வந்து செல்ல நடவடிக்கை எடுக்க வேண்டும்.

பேரூராட்சி தலைவர் நஜூமுதீன்: கவுன்சிலர்களின் கோரிக்கைகளுக்கு விரைவில் நடவடிக்கை எடுக்கப்படும்.

கூட்டத்தில் பேரூராட்சி பணியாளர்கள் மற்றும் கவுன்சிலர்கள் கலந்து கொண்டனர்.