அலைபேசி வீடியோ வைரல்

மடப்புரம் கோயிலுக்கு வந்த திருமங்கலம் பேராசிரியை நிகிதா நகைகள் திருடு போனதாக அளித்த புகாரின்பேரில் அஜித்குமாரை தனிப்படை போலீசார் விசாரித்தனர். ஜூன் 28 விசாரணையின் போது போலீசார் தாக்கியதில் உயிரிழந்தார். ஜூன் 29ல் உடலை வாங்க மறுத்து மடப்புரத்தில் பொதுமக்கள் போராட்டத்தில் ஈடுபட்டனர்.
அப்போது அரசியல் கட்சியினர், போலீசார், அஜித்குமார் உறவினர்களுடன் திருமண மஹாலின் கதவுகளை மூடி விட்டு பேச்சுவார்த்தை நடத்தினர். இதனை அப்பகுதி இளைஞர்கள் சிலர் ஜன்னல் வழியாக அலைபேசியில் வீடியோவாக பதிவு செய்துள்ளனர். தற்போது இந்த வீடியோ வைரலாகி வருகிறது. பழையனூர் போலீஸ் ஸ்டேஷனில் பணிபுரியும் எஸ்.பி., தனிப்பிரிவு போலீஸ் ஒருவர் ஜன்னல் கதவை மூடியுள்ளார்.
திருமண மஹாலை சுற்றியிருந்த பொதுமக்கள் ஜன்னல் கதவை உடைத்ததுடன் சமாதான பேச்சு வார்த்தைக்கு எதிர்ப்பு தெரிவித்துள்ளனர். சி.பி.ஐ., விசாரணை தொடங்கிய நிலையில் சமாதானப்பேச்சுவார்த்தையில் ஈடுபட்டவர்கள் மீதும் நடவடிக்கை எடுக்க வேண்டும் என சிலர் தற்போது அலைபேசி பதிவுகளை கசிய விட்டுள்ளது தெரிய வந்துள்ளது.