ஹிந்து அறநிலையத்துறையின் கீழ் கொல்லங்குடி அருகேயுள்ள அரியாக்குறிச்சியில் வெட்டுடையார் காளியம்மன் கோயில் உள்ளது. இக்கோயில் கும்பாபிேஷகம் செப்., 8ம் தேதி நடந்தது. செப்., 7ல் இக்கோயிலுக்கு அறங்காவலர் குழு தலைவர், உறுப்பினர்கள் இருவர் என 3 பேரை ஹிந்து அறநிலையத்துறை நியமித்தது.

இக்கோயிலில் 1985ம் ஆண்டில் இருந்தே அறங்காவலர் குழு தலைவர், 4 உறுப்பினர்கள் என 5 பேர் இருந்து வந்தனர். 2009ம் ஆண்டு வரை அதுவே நடைமுறை.

அதிலும் ஒரு உறுப்பினர் ஆதிதிராவிடர் வகுப்பை சேர்ந்தவராக நியமிக்கப்பட்டார். அவர்களின் பதவிக்காலம் முடிந்தபின் அறங்காவலர் குழுவே நியமிக்கப்படவில்லை.

செப்., 7 ம் தேதி நியமிக்கப்பட்ட அறங்காவலர் குழுவில் தலைவர், உறுப்பினர் 2 பேர் என 3 பேர் மட்டுமே நியமித்துள்ளனர். இதில், ஒருவர் கூட ஆதிதிராவிடர் வகுப்பை சேர்த்தவர் இல்லை.

ஏற்கனவே உள்ள நடைமுறைப்படி 5 பேரை நியமித்து, அதில் ஒரு ஆதிதிராவிடருக்கு உறுப்பினர் பதவி வழங்க வேண்டும், கோயில் இருக்கும் இடத்தில் இருந்து 8 கி.மீ., சுற்றளவில் வசிப்பவர்களை மட்டுமே அறங்காவலர் குழுவில் நியமிக்க வேண்டும். அந்த விதிகளும் மீறப்பட்டுள்ளதாக அரியாக்குறிச்சி கிராமத்தினர் கலெக்டர் ஆஷா அஜித்திடம் புகார் அளித்தனர்.

3 பேர் தான்...

ஹிந்து அறநிலையத்துறை இணை கமிஷனர் பாரதி கூறியதாவது: கொல்லங்குடி கோயிலுக்கு தலைவர் உட்பட 3 பேர் மட்டுமே நியமிக்க வேண்டும் என்ற விதி உள்ளது. அதிலும், ஆதிதிராவிடருக்கு உறுப்பினர் பதவி தர வேண்டும் என விதியில் இல்லை. ஏற்கனவே அறங்காவலர் குழுவில் 5 பேரை நியமித்தது, தவறுதலாக நடந்துள்ளது என்றார்.