இங்குள்ள வீரையா கோயிலில் புரட்டாசி வழிபாட்டை முன்னிட்டு எருதுகட்டு விழா நடத்தப்பட்டது.விழாவுக்காக சேவுகப்பெருமாள் ஐயனார் கோயிலுக்கு நேர்ந்து விடப்பட்ட காளைகளில் இருந்து முழு வெள்ளை நிற காளை தேர்ந்தெடுக்கப்பட்டது. அதன் முன்னங்கால்களில் 4 ஐம்பொன் சலங்கைகள் மாட்டப்பட்டு வீரையா கோயில் வளாக மரத்தில் கட்டி வைக்கப்பட்டது.

அக். 7ஆம் தேதி இரவு 10:00 மணிக்கு சிறப்பு வழிபாட்டுக்கு பிறகு காளையின் கழுத்தில் கட்டப்பட்டிருந்த வடம் வெட்டி அவிழ்க்கப்பட்டது. இதைத் தொடர்ந்து ஓடிய காளையை பலரும் விரட்டிச் சென்றனர். காளை ஓடிய போது அதன் கால்களில் இருந்து 3 சலங்கைகள் விழுந்தன. இதனால் இந்த ஆண்டு மூன்று போகம் விளைச்சல் கிடைக்கும் என்று இப்பகுதி மக்கள் நம்பிக்கை தெரிவித்தனர்.