விவசாய பணிக்கு வெப்பநிலை, மழை அளவு, ஈரப்பதம், காற்றின் திசை, அதன் வேகம், அழுத்தம், மண்ணின் ஈரப்பதம், தட்ப வெப்ப நிலை முக்கிய இடம் பெறுகிறது. இதனை அறிந்து கொள்ள வானிலை ஆய்வு மையம் பயன்படுகின்றன. திடீர் புயல், வெயிலின் தாக்கம். அசாதாரண வெப்பம் போன்றவற்றால் விவசாய பயிர்களை பாதிக்கின்றன. இது பற்றி முன் கூட்டியே தகவல் தெரிந்தால் அதற்கு ஏற்ப முன்னெச்சரிக்கை மேற்கொள்வர்.

மஹாராஷ்டிரா மாநிலத்தில் தானியங்கி வானிலை ஆய்வு மையங்கள் அமைத்து திராட்சை, ஆரஞ்சு உள்ளிட்ட சாகுபடியில் விவசாயிகளுக்கு தட்ப வெப்ப நிலையை முன்னதாக தெரிவித்து வருகிறது. இதனால் விவசாயம் பாதிக்கப்படுவதில்லை.

இதனை பின் பற்றி தமிழக விவசாயிகள் பயன்பெறும் வகையில் வட்டார வேளாண் அலுவலகம் உள்ள பகுதிகள், ஊராட்சி அளவிலும் வேளாண் வளர்ச்சி திட்டத்தின் கீழ் தானியங்கி வானிலை மையங்கள் அமைக்க புனே தேசிய திராட்சை ஆராய்ச்சி மையம், கோவை விவசாய பல்கலை முடிவு செய்தது. காலநிலை அறிய டோல்ப்ரீ எண் வழங்கவும், ஒரு வாரத்திற்கு முன்பே தட்பவெப்ப நிலை மாற்றம் குறித்து தெரிவிக்கப்படும். அதற்கு ஏற்ப இடு பொருட்களை விவசாயிகள் பயன்படுத்த தோட்டக்கலை அதிகாரிகள் ஆலோசனை வழங்கிட தானியங்கி வானிலை மையம் அமைக்க ஆய்வு செய்யப்பட்டன.

தேனி மாவட்டத்தில் போடி, தேனி, பெரியகுளம், ஆண்டிப்பட்டி, கடமலைக் குண்டு, சின்னமனூர், உத்தமபாளையம், கம்பம் பகுதிகளில் தமிழ்நாடு வேளாண் வானிலை வலையமைப்பிற்கான தானியங்கி வானிலை மையம் 2 ஆண்டுகளுக்கு முன்பு அமைக்கப்பட்டன. அதன் பின் முறையாக பராமரிப்பு இல்லாமல் உத்தமபாளையம், பெரியகுளம் தவிர மற்ற பகுதிகளில் செயல்படாமல் முடங்கிய நிலையில் உள்ளன. ஊராட்சி அளவில் திட்டமும் செயல்படுத்தாமல் கிடப்பில் உள்ளன.

இதனால் காலநிலை மாற்றம் அறிந்து கொள்ள விவசாயிகள் சிரமம் அடைகின்றனர். மழை, புயலால் பயிர் சேதம் ஏற்படுவதால் விவசாயிகள் பாதிப்படைகின்றனர். பயன்பாடு இன்றி கிடப்பில் உள்ள தானியங்கி வானிலை மையங்களை சீரமைத்து பயன்பாட்டிற்கு கொண்டு வர அதிகாரிகள் நடவடிக்கை எடுக்க விவசாயிகள் வலியுறுத்தி உள்ளனர்.