மகப்பேறு பிரிவில் , ஏழு கர்ப்பிணியர், ஆறு பிரசவித்த பெண்கள், பச்சிளம் குழந்தைகள் உட்பட, 19 பேர் மகப்பேறு வார்டில் உள்நோயாளிகளாக தங்கி சிகிச்சை பெற்று வந்தனர்.

நேற்று மாலை 3:00 மணிக்கு, மகப்பேறு வார்டில் கர்ப்பிணியருக்கு சிகிச்சை அளிக்கும் அறையில் இருந்த குளிர்சாதன பெட்டியில் திடீரென தீப்பிடித்து புகை வந்தது. இதனால், அறை முழுதும் புகை சூழ்ந்ததால், அங்கிருந்த மருத்துவர், செவிலியர் உடனே வெளியேறினர்.

மேலும், மருத்துவமனை தலைமை மருந்தாளர் நேதாஜி மற்றும் மருத்துவ ஊழியர்கள், சம்பவ இடத்திற்கு விரைந்து வந்து, மகப்பேறு வார்டில் இருந்த 19 பேரையும் மீட்டனர்.

பின், மருத்துவமனை ஊழியர்கள் உடனடியாக மகப்பேறு வார்டுக்கு செல்லும் மின்சாரத்தை துண்டித்தும், தீ அணைக்கும் கருவியால் குளிர்சாதன பெட்டி மீது எழுந்த புகை மற்றும் தீயை அணைக்கும் பணியில் ஈடுபட்டனர்.

திருத்தணி தீயணைப்பு வீரர்கள் விரைந்து வந்து தீயை அணைத்தனர். பின், வார்டு முழுதும் சுத்தம் செய்து, மீண்டும் கர்ப்பிணியர், பச்சிளம் குழந்தை என, 19 பேரையும் மகப்பேறு வார்டிற்கு அழைத்து வந்தனர். அதிர்ஷ்டவசமாக யாருக்கும், எவ்வித பாதிப்பும் ஏற்படவில்லை.

மாலை 4:30 மணிக்கு திருத்தணி அரசு மருத்துவமனையின் தலைமை மருத்துவர் லட்சுமிநரசிம்மன் மகப்பேறு வார்டிற்கு சென்று, தீ விபத்து ஏற்பட்ட அறையை பார்வையிட்டார்.