துாத்துக்குடி மாவட்டம், சாத்தான்குளம் அருகே போலையர்புரத்தை சேர்ந்தவர் பச்சப்பு தர்மராஜ், 83. இவரது மனைவி தங்க புஷ்பம், 77. கடந்த 55 ஆண்டுகளுக்கு முன் திருமணம் முடிந்ததுள்ளது. 2 மகன்களும் 3 மகள்களும் உள்ளனர். அனைவருக்கும் திருமணம் முடிந்து தனித்தனியே சென்று விட்டனர்.

போலையர்புரத்தில் உள்ள வீட்டில் பச்சப்பு தர்மராஜும், தங்கபுஷ்பமும் தனியே வசித்து வந்தனர். சில ஆண்டுகளாக உடல் நலம் பாதிக்கப்பட்டு மருத்துவ சிகிச்சை பெற்று வந்த தங்கபுஷ்பம் நேற்று அதிகாலை 5:30 மணியளவில் மரணம் அடைந்தார்.

அவரது உடலை நல்லடக்கம் செய்வதற்கான பணிகளை உறவினர்கள் மேற்கொண்டு வந்த நிலையில், பச்சப்பு தர்மராஜின் உடல் நலம் மோசமானதால் மருத்துவமனையில் அனுமதிக்கப்பட்டார். அங்கேயே காலை 7:30 மணியளவில் அவரது உயிர் பிரிந்தது.

55 ஆண்டுகளாக ஒன்றாக வசித்து வந்த தம்பதி ஒரே நாளில் அடுத்தடுத்து மரண மடைந்திருப்பது கிராம மக்களிடையே சோகத்தை ஏற்படுத்தியுள்ளது.