திருப்பூர் மாவட்ட ஏ.ஐ.டி.யு.சி., மோட்டார் தொழிலாளர் சங்க பொதுக்குழு கூட்டம், இ.கம்யூ., அலுவலகத்தில் நேற்று நடந்தது. சங்க தலைவர் சசிகுமார் தலைமை வகித்தார். பொது செயலாளர் சுரேஷ், வேலை அறிக்கையை சமர்ப்பித்தார். கூட்டத்தில், மாநில பொதுக்குழுவை, திருப்பூர் மாவட்டத்தில் நடத்துவது; 2024ம் ஆண்டுக்கான உறுப்பினர் பதிவை விரைந்து முடிப்பது; புதிய ஆட்டோ ஸ்டாண்ட் உருவாக்குவது என தீர்மானிக்கப்பட்டது.

மாநகர பகுதிகளில், போலீசார், சரக்கு வாகன ஆட்டோ டிரைவர்களிடம் மரியாதை குறைவாக நடந்து கொள்கின்றனர்; பழிவாங்கும் நோக்கில் அபராதம் விதிக்கின்றனர். இதுகுறித்து, கலெக்டரிடமும், எஸ்.பி.,யிடமும் முறையிடுவது என தீர்மானிக்கப்பட்டது. இதுபோன்ற அவமதிப்பு சம்பவம் தொடரும்பட்சத்தில், கண்டன ஆர்ப்பாட்டம் நடத்துவது எனவும், பொதுக்குழுவில் முடிவு செய்யப்பட்டுள்ளது.