திருப்பூர் மாவட்டம் உடுமலை அருகேயுள்ள திருமூர்த்திமலையில், ஆடிப்பெருக்கு தினமான நேற்று, பல்வேறு மாவட்டங்களிலிருந்து ஆயிரக்கணக்கான பக்தர்கள் மற்றும் சுற்றுலா பயணியர் வந்திருந்தனர்.

வழக்கம் போல், அருவியில் குளித்தும், மலையடிவாரத்திலுள்ள அமணலிங்கேஸ்வரர் கோவிலில் மும்மூர்த்திகளை வழிபட்டனர். மதியம், 1:00 மணியளவில், மேல் மலைப்பகுதியில் கனமழை பெய்து வருவதாக வனத்துறையினர் எச்சரிக்கை விடுத்தனர். அருவியில் வெள்ளப்பெருக்கு அபாயம் காரணமாக, உடனடியாக அருவியில் குளித்துக்கொண்டிருந்த நுாற்றுக்கணக்கானவர்களை, வனத்துறையினர், கோவில் ஊழியர்கள், போலீசார், தீயணைப்பு துறையினர் இணைந்து, பாதுகாப்பாக வெளியேற்றப்பட்ட நிலையில், மதியம், 2:30 மணிக்கு அருவியில் வெள்ளப்பெருக்கு ஏற்பட்டு, நீர் ஆர்ப்பரித்து கொட்டியது.

அதே போல், மலையடிவாரத்திலுள்ள தோணியாற்றிலும் காட்டாற்று வெள்ளம் ஏற்படும் என்பதால், கோவில் நடை சார்த்தப்பட்டு, கோவில் வளாகத்திலிருந்த பக்தர்களும் வெளியேற்றப்பட்டனர். தடுப்புகள் அமைத்து பாதுகாப்பு பணி மேற்கொள்ளப்பட்ட நிலையில், மதியம், 3:00 மணிக்கு, கோவில் வளாகத்தையும் காட்டாற்று வெள்ளம் சூழ்ந்தது. முன்னெச்சரிக்கை மற்றும் பாதுகாப்பு நடவடிக்கையால், பாதிப்புகள் தவிர்க்கப்பட்டது.ஆடிப்பெருக்கு தினமான நேற்று, திருமூர்த்திமலை அருவி மற்றும் கோவில் வளாத்தில் வெள்ளப்பெருக்கு எற்பட்டுள்ளது குறிப்பிடத்தக்கது.