கலெக்டர் மனிஷ் நாரணவரே தலைமை வகித்தார். மாநகராட்சி கமிஷனர் அமித், போலீஸ் எஸ்.பி., கிரிஷ் அசோக் யாதவ், போலீஸ் துணை கமிஷனர்கள தீபா, பிரவீன் கவுதம் உள்ளிட்டோர் பங்கேற்றனர்.

திருப்பூர் நகர பகுதிகளில் சிலைகள் பிரதிஷ்டை செய்வோர், போலீஸ் துணை கமிஷனர்களிடமும், ஊரக பகுதிகளில், அந்தந்த வருவாய் கோட்டாட்சியர்களிடமும் அனுமதி பெற்று, சிலைகளை நிறுவ வேண்டும்.

சிலைகள், சுற்றுச்சூழல் பாதிக்காத வகையில், களிமண்ணால் தயாரிக்கப்பட்டதாக இருக்கவேண்டும். நீர் நிலைகளை மாசுபடுத்தாத, இயற்கை வண்ணங்கள் மட்டுமே பூசப்பட்டிருக்க வேண்டும்.

ரசாயன வண்ண பூச்சு சிலைகளை பயன்படுத்த கூடாது. சிலைகளின் உயரம், பீடம் மற்றும் மேடையுடன் சேர்த்து, அதிகபட்சம் பத்து அடிக்கு மேல் இருக்க கூடாது. சிலை பிரதிஷ்டை செய்யப்படும் பகுதியில், எளிதில் தீப்பிடிக்கும் பொருட்களால் மேற்கூரை அமைக்க கூடாது; பக்கவாட்டில் தடுப்புகள் அமைக்க கூடாது. ஒவ்வொரு சிலைக்கும், 24 மணி நேரமும் பாதுகாப்புக்கு பொறுப்பாளரை நியமிக்க வேண்டும். போலீசார் அனுமதிக்கும் வழித்தடத்தில் மட்டுமே விசர்ஜன ஊர்வலம் நடத்த வேண்டும்.

இவ்வாறு, ஆய்வுக்கூட்டத்தில் அறிவுறுத்தப்பட்டது.