திருப்பூர் நஞ்சராயன் குளம் கடந்த, 2021ல், தமிழகத்தின், 16வது பறவைகள் சரணாலயமாக அறிவிக்கப்பட்டது; தொடர்ச்சியாக உலகளாவிய ராம்சர் அங்கீகாரமும் வழங்கப்பட்டது. தற்போது மத்திய அரசு வழிகாட்டுதல் படி, உணர்திறன் மண்டல எல்லை வரையறை தொடர்பான நடவடிக்கை எடுக்கப்பட்டுள்ளது.

சரணாலய அந்தஸ்து பெற்ற எந்தவொரு பகுதியின் எல்லையை ஒட்டியும், அதிகபட்சம், 10 கி.மீ., சுற்றளவுக்கு, பாதிப்பு ஏற்படுத்தும் குவாரிகள், அதிக ஒலி எழுப்பும் மற்றும் அதிக சாயநீர் வெளியேற்றும் நிறுவனங்கள், அதிகளவு சாக்கடை, கழிவுநீர் வெளியேற்றும் ஓட்டல், ரிசார்ட் உள்ளிட்ட கட்டுமானங்கள் இருக்கக்கூடாது என்பது, மத்திய அரசின் உணர்திறன் மண்டல மசோதா சொல்லும் விதி.

உயிர்ச்சூழல் பாதிக்கக்கூடாது அதன் அடிப்படையில், நஞ்சராயன் குளத்துக்கு வரும் பறவைகளுக்கு எவ்வித பாதிப்பும் ஏற்படாத வகையிலும், வெளிநாட்டு பறவைகளின் வலசை தடைபடாமல் இருக்கவும், சரணாலயத்தின் உயிர்ச்சூழல் மண்டலம் பாதிக்கப்படக்கூடாது என்ற நோக்கிலும், அதன் எல்லையை, சுற்றுச்சூழல் உணர்திறன் மண்டலமாக அறிவிப்பதற்குரிய நடவடிக்கையை மாவட்ட நிர்வாகம் மேற்கொண்டுள்ளது.இதற்கென கலெக்டர் தலைமையில், மாவட்ட வன அலுவலர், நீர்வளத்துறை, வருவாய்த்துறை, மாசுக்கட்டுப்பாடு வாரியம், ஊரக வளர்ச்சி முகமை உள்ளிட்ட சம்பந்தப்பட்ட துறை சார்ந்த அலுவலர்கள் மற்றும் தன்னார்வ அமைப்பினரை உள்ளடக்கி கமிட்டி அமைக்கப்பட்டது.

முன்மொழிவு தயாரிப்பு இக்கமிட்டியினர், நஞ்சராயன் குளத்தையொட்டி உள்ள குடியிருப்புகள், தொழிற்சாலைகள், அவற்றால் குளத்துக்கு ஏற்படும் சாதக, பாதகம் உள்ளிட்ட அனைத்து விஷயங்களையும் அலசி ஆராய்ந்தனர். பின், சரணாலயத்தை ஒட்டியுள்ள பகுதிகளில் வசிக்கும் மக்களிடம், கடந்த, 12ம் தேதி கருத்துக்கேட்பு கூட்டமும் நடத்தினர்.

நேற்று முன்தினம், கலெக்டர் மனிஷ் நாரணவரே தலைமையில், நஞ்சராயன் பறவைகள் சரணாலயத்திற்கான சுற்றுச்சூழல் உணர்திறன் மண்டலத்தை அறிவிப்பதற்குரிய வரைவு முன்மொழிவு தயாரிக்கப்பட்டு, தொடர்புடைய அனைத்து துறை அதிகாரிகளின் ஒப்புதல் பெறப்பட்டது. இந்த ஒப்புதல், வனத்துறை உயரதிகாரிகள் வாயிலாக மத்திய அரசின் வனத்துறை ஒப்புதலுக்கு அனுப்பி வைக்கப்பட்டு, பின், சுற்றுச்சூழல் உயிர்மண்டல பகுதியாக அறிவிக்கப்படும் .

விதிமுறை மீறினால் சட்ட நடவடிக்கை நஞ்சராயன் குளம் நகர்ப்புறத்தை ஒட்டி இருப்பதாலும், ஏற்கனவே, அங்கு தொழிற்சாலை உள்ளிட்ட கட்டுமானங்கள் இருப்பதாலும், குளத்தையொட்டி அரை கி.மீ., சுற்றளவுக்கு மட்டும் சுற்றுச்சூழல் உணர்திறன் மண்டல எல்லையாக அறிவிக்க, முன்மொழிவு தயாரிக்கப்பட்டுள்ளது. இந்த எல்லைக்குள் குவாரிகள்; மிக அதிக ஒலி, சப்தம் எழுப்பும் நிறுவனங்கள், தொழிற்சாலைகள்; அதிகளவு கழிவுநீரை வெளியேற்றும் பெரிய ஓட்டல், ரிசார்ட்கள்; குளத்து நீரை மாசுப்படுத்தும் வகையில் சாயக்கழிவுநீரை வெளியேற்றும் தொழிற்சாலைகள் இருக்கக்கூடாது உள்ளிட்ட பல விதிமுறைகள் கடைபிடிக்கப்படும். இதை மீறுவோர் மீது, சுற்றுச்சூழல் பாதுகாப்பு சட்டத்தின் கீழ் நடவடிக்கை எடுக்கப்படும்.

குறிப்பிட்ட காலத்துக்குள், சுற்றுச்சூழல் உணர்திறன் மண்டல எல்லை வரையறை செய்யப்படாவிட்டால், சுப்ரீம் கோர்ட் உத்தரவுபடி, நஞ்சராயன் சரணாலயத்தையொட்டி, 10 கி.மீ., சுற்றளவுக்கு சுற்றுச்சூழல் உணர்திறன் மண்டலமாக, மத்திய அரசு தானாகவே அறிவித்து விடும்.