அடர்ந்த வனப்பகுதியில் அமைந்துள்ள இந்த ரோட்டின் இரு புறமும், மண் அரிப்பு காரணமாக மிகப்பெரிய பள்ளங்களாக மாறி, ஆபத்தான நிலையில் உள்ளது. அதே போல், எஸ்-வளைவு மேம்படுத்தப்படாமல் குறுகலாக உள்ளதோடு, பாதுகாப்பு சுவர்கள், கம்பி வேலி உடைந்து ஆபத்தான நிலையில் உள்ளது.

நேற்று, காலை ஆந்திரா மாநிலத்திலிருந்து, சுற்றுலா பயணிகளை ஏற்றி வந்த பஸ், எஸ்-வளைவில் திரும்ப முடியாமல், சிக்கிக்கொண்டது. உடனடியாக உள்ளிருந்த பயணிகள் பாதுகாப்பாக வெளியேற்றப்பட்டு, கன ரக வாகனங்கள் வாயிலாக மீட்கப்பட்டது.

இதனால், இந்த ரோட்டில், காலை, 6:00 மணி முதல், 9:00 மணி வரை, மூன்று மணி நேரம் போக்குவரத்து பாதித்தது. இரு புறமும் ஏரளமான வாகனங்களில், நுாற்றுக்கணக்கான மக்கள் பாதித்தனர். அவசர மருத்துவ தேவைக்காக வந்த ஆம்புலன்ஸ் கூட செல்ல வழியின்றி பாதிப்பு ஏற்பட்டது.

எனவே, உடுமலை- மூணாறு ரோட்டில், இரு புறமும் உள்ள புருவம் பகுதியில் ஏற்பட்டுள்ள ஆபத்தான பள்ளங்களை மேம்படுத்தவும், எஸ்-வளைவில் உரிய மேம்பாடு மற்றும் பாதுகாப்பு பணி மேற்கொள்ளவும், வனத்துறை மற்றும் நெடுஞ்சாலைத்துறை அதிகாரிகள் நடவடிக்கை எடுக்க வேண்டும்.