கிருஷ்ணகிரி: கிருஷ்ணகிரி நகராட்சியில், 33 வார்டுகள் உள்ளன. இதில், பெரும்பாலான வார்டுகளில் முஸ்லிம்கள் அதிகம் உள்ளனர். அவர்களது ஓட்டுகளை பெறுவதற்காக, 'இண்டியா' கூட்டணியின் கிருஷ்ணகிரி லோக்சபா தொகுதி, காங்., வேட்பாளர் கோபிநாத்திற்கு ஆதரவாக, கிருஷ்ணகிரி நகராட்சிக்கு உட்பட்ட பகுதிகளை சேர்ந்த, 2 ஜமாத் கமிட்டி நிர்வாகிகளிடம், கிருஷ்ணகிரி, தி.மு.க., கிழக்கு மாவட்ட செயலாளர் மதியழகன் எம்.எல்.ஏ., ஓட்டு சேகரித்து பேசுகையில், ''சிறுபான்மையினருக்கு ஆதரவாக என்றும் தமிழக முதல்வர் ஸ்டாலின் துணை நிற்பார். அதனால் தான், தமிழகத்தில் ஜாதி, மத பேதமற்ற திராவிட மாடல் ஆட்சி சிறப்பாக நடக்கிறது. இதை விரிவுபடுத்தத்தான், 'இண்டியா' கூட்டணி உருவாக்கப்பட்டுள்ளது. கிருஷ்ணகிரியில் போட்டியிடும் நம் கூட்டணி வேட்பாளர் கோபிநாத்திற்கு கை சின்னத்தில் ஓட்டளித்து வெற்றி பெற செய்ய வேண்டும்,'' என்றார்.