சிவகாசியில் சிறிதும், பெரிதுமாக 300க்கும் மேற்பட்ட காலண்டர் தயாரிப்பு நிறுவனங்கள் உள்ளன. ஒவ்வொரு ஆண்டும் ஆடி 18ம் பெருக்கை முன்னிட்டு இங்குள்ள காலண்டர் உற்பத்தியாளர்கள் புதிய ஆண்டுக்கான ஆல்பத்தை வெளியிடுவர். புதிய ஆல்பங்களை தங்களது ஏஜன்ட்கள், வாடிக்கையாளர்கள், மக்களுக்கும் அறிமுகம் செய்வர். இதன் பின் வரும் ஆர்டர்களுக்கு புதிய ஆண்டுக்கான மாதாந்திர, தினசரி, டேபிள் காலண்டர் தயாரிக்கும் பணிகள் துவங்கும்.

2025 ஆண்டுக்கான காலண்டருக்கு 2024 நவ., வரை ஆர்டர் பெற்று, டிச.,ல் காலண்டர் தயாரிப்பு பணிகள் தீவிரமாக நடக்கும். ரூ.15 முதல் ரூ. 2500 வரை காலண்டர் பல்வேறு விலைகளில் வித விதமாக கிடைக்கிறது. இந்தாண்டு விலைவாசி கட்டுக்குள் இருந்தாலும் மின் கட்டணம், வேலையாட்களின் கூலி உயர்வு காரணங்களால் காலண்டர் 10 சதவீதம் விலை உயர்ந்துள்ளது.

தமிழ்நாடு காலண்டர் உற்பத்தியாளர்கள் சங்க செயலாளர் ஜெயசங்கர் கூறியதாவது: மின் கட்டணம், வேலையாட்கள் கூலி, மூலப்பொருட்கள் விலை உயர்வால் காலண்டர் விலை 10 சதவீதம் உயர்ந்துள்ளது. தற்போது வரை உற்பத்தி நிறுவனங்களால் 50 சதவீதம் ஆர்டர் பெறப்பட்டுள்ளது. டிசம்பர் இறுதிக்குள் முழுமையான ஆர்டர்கள் கிடைக்கும். உள்ளாட்சித் தேர்தல் நடந்தால் ஐந்து சதவீதம் காலாண்டர் உற்பத்தி அதிகரிக்க வாய்ப்பும் உள்ளது, என்றார்.