பிப்., 17ல் வெம்பக்கோட்டை அருகே ராமுத்தேவன்பட்டியில் பட்டாசு ஆலை வெடிவிபத்தில் 11 பேர் உயிரிழந்தனர். 2 பேர் காயமடைந்தனர். இது தொடர்பாக பட்டாசு ஆலை உரிமையாளர் விக்னேஷ், மேலாளர் ஜெயபால், போர்மேன் சுரேஷ் குமார் மீது ஆலங்குளம் போலீசார் வழக்கு பதிவு செய்தனர்.

இந்நிலையில் பட்டாசு ஆலை உரிமையாளர் விக்னேஷ் முன்ஜாமின் கோரி ஸ்ரீவில்லிபுத்துார் முதன்மை மாவட்ட நீதிமன்றத்தில் வழக்கு தொடர்ந்தார்.

இதனை விசாரித்த முதன்மை மாவட்ட நீதிபதி ஜெயக்குமார், பலியான 11 பேர் குடும்பங்களுக்கும் தலா ரூ.10 லட்சமும், காயமடைந்த 2 பேருக்கு தலா ரூ. 2 லட்சமும் பட்டாசு ஆலை உரிமையாளர் வழங்கி அது தொடர்பான ஆவணங்களை நீதிமன்றத்தில் தாக்கல் செய்ய உத்தரவிட்டார்.

அதன்படி நேற்று வெம்பக்கோட்டை இன்ஸ்பெக்டர் சங்கர் முன்னிலையில் பலியான 11 பேரில், 10 பேர் குடும்பங்களுக்கு தலா ரூ.10 லட்சமும், காயமடைந்த 2 பேருக்கு தலா ரூ. 2 லட்சமும் டி.டி.,யாக வழங்கப்பட்டது. இதில் விடுபட்ட ஒருவருக்கு, வாரிசு யார் என்பதில் தீர்வு ஏற்படாததால் அவருக்கு ரூ. 10 லட்சம் வழங்கப்படவில்லை. இதனையடுத்து பட்டாசு ஆலை உரிமையாளர் விக்னேஷிற்கு நிபந்தனை ஜாமின் வழங்கி நீதிபதி ஜெயக்குமார் உத்தரவிட்டார்.