தமிழகத்தில் பயங்கரவாத செயலை முறியடிக்க, கியூ பிரிவு, ஒ.சி.ஐ.யு., எனப்படும், ஒருங்கிணைந்த குற்றப் புலனாய்வு பிரிவு, ஏ.டி.எஸ்., எனப்படும், பயங்கரவாத தடுப்பு பிரிவுகள் செயல்படுகின்றன. இப்பிரிவு போலீசாருடன், காவல் நிலைய நுண்ணறிவு பிரிவு மற்றும் உளவுத்துறை போலீசார் இணைந்து செயல்படுகின்றனர்.

அதேபோல, மத்திய உள்துறை அமைச்சகத்தின் கீழ் செயல்படும், என்.ஐ.ஏ., எனப்படும், தேசிய புலனாய்வு நிறுவன அதிகாரிகளும், தடை செய்யபப்பட்ட பயங்கரவாத அமைப்புகள் மற்றும் அதன் நிர்வாகிகள் மீது, தொடர் நடவடிக்கையில் ஈடுபட்டு வருகின்றனர்.

அதன்படி, மத்திய, மாநில போலீஸ் அதிகாரிகள் நடத்திய விசாரணையில், காஞ்சிபுரம், விழுப்புரம், சேலம் மாவட்டங்களில் பயங்கரவாத அமைப்புகளின் ஆதரவாளர்கள் பெருகி வருவது தெரியவந்துள்ளது.

இதனால், இந்த மூன்று மாவட்டங்களிலும், பயங்கரவாத செயல்களை முறியடிக்கவும், அது தொடர்பான சவால்களை எதிர்கொள்ளவும், சிறப்பு புலனாய்வு பிரிவுகளை ஏற்படுத்தும் பணி நடக்கிறது.

போலீஸ் அதிகாரிகள் கூறுகையில், 'மத பழமைவாதம் எனப்படும், பயங்கரவாத செயலுக்கு எதிராக தொடர் நடவடிக்கையில் ஈடுபட்டு வருகிறோம். அந்த வகையில், காஞ்சிபுரம், சேலம் மற்றும் விழுப்புரத்தில், 2.38 கோடி ரூபாயில், சிறப்பு புலனாய்வு பிரிவின் மூன்று யூனிட்டுகளை அமைக்கும் பணி நடக்கிறது' என்றனர்.