கமுதி அருகே பசும்பொன்னில் முத்துராமலிங்கத்தேவரின் குருபூஜை, ஜெயந்தி விழா 3 நாட்கள் நடக்கிறது. இதை முன்னிட்டு பாதுகாப்பு பணிக்காக மாநிலம் முழுவதும் இருந்து போலீசார் வந்துள்ளனர். கோவையைச் சேர்ந்த 30 போலீசார் ஒரு வேனில் ராமநாதபுரம் வந்தனர். அங்கிருந்து அவர்கள் கமுதிக்கு புறப்பட்டனர். நேற்றுமுன்தினம் அதிகாலை 2:00 மணிக்கு சத்திரக்குடி அருகே கீழகோட்டை வழியாக கீழம்பல் நோக்கி சென்றனர். டிரைவர் 'கூகுள் மேப்' உதவியுடன் வேனை ஓட்டிச்சென்றார். அப்போது அப்பகுதியில் இருந்த கண்மாயில் நிலை தடுமாறி வேன் கவிழ்ந்தது. இதில் காயமடைந்த 20 போலீசாருக்கும் 108 ஆம்புலன்ஸ் வரவழைக்கப்பட்டு முதலுதவி சிகிச்சை அளிக்கப்பட்டது.

பின் காயமடைந்தவர்கள் பரமக்குடி, ராமநாதபுரம் அரசு மருத்துவக்கல்லுாரி மருத்துவமனைகளுக்கு அனுப்பி வைக்கப்பட்டனர். சத்திரக்குடி போலீசார் விசாரிக்கின்றனர்.