தமிழகத்தில் ஆரம்ப சுகாதார நிலையம், நகர்ப்புற சுகாதார நிலையம், துணை சுகாதார நிலையம், வட்டார மருத்துவமனை, வட்டம் சாராத மருத்துவமனை, மாவட்ட தலைமை மருத்துவமனை, அரசு மருத்துவ கல்லுாரி மருத்துவமனை என மொத்தம், 11,333 மருத்துவமனைகள் உள்ளன.

இந்நிலையில், மாநில அரசின் வேண்டுகோளின்படி, புதிதாக, 25 ஆரம்ப சுகாதார நிலையங்கள், 25 நகர்ப்புற சுகாதார நிலையங்கள் அமைக்கவும், மருத்துவ பணியாளர்களை நியமிக்கவும், மத்திய அரசு 2022ல் அனுமதி வழங்கியது. இதற்காக, 40 சதவீத நிதியையும் ஒதுக்கீடு செய்தது.

அதனுடன், தமிழக அரசின் 60 சதவீத நிதியையும் சேர்த்து, 2023- -- 2024ம் நிதியாண்டில் தலா, 1.20 கோடி ரூபாய் மதிப்பில், 25 ஆரம்ப சுகாதார நிலையங்கள், 25 நகர்ப்புற சுகாதார நிலையங்கள், 50 ஊர்களில் கட்டப்பட்டன.

இதன் கட்டுமானப் பணிகள் முழுதும் முடிவடைந்து, அவை சம்பந்தப்பட்ட துறையிடம், 2024ம் ஆண்டின் இறுதியில் ஒப்படைக்கப்பட்டன. ஆனாலும், இந்த கட்டடங்களுக்கு திறப்பு விழா இதுவரை நடக்கவில்லை.

அனைத்தையும், ஒரே நாளில் வீடியோ கான்பரன்சிங் வாயிலாக திறப்பதற்காக, முதல்வரிடம் தேதி கேட்கப்பட்டு உள்ளதாக பொது சுகாதாரம் மற்றும் நோய் தடுப்புத்துறை வட்டாரங்கள் கூறுகின்றன.

எப்படியாயினும், அவற்றை உடனடியாக திறந்து மக்கள் பயன்பாட்டிற்கு கொண்டுவர வேண்டும் என்பதே, பொதுமக்களின் எதிர்பார்ப்பாக உள்ளது.

-நமது நிருபர் -