தமிழக பா.ஜ., தலைவர் அண்ணாமலை, 2023 ஏப்., 14ல், தி.மு.க., பைல்ஸ் பாகம் ஒன்று வெளியிட்டார். அதில் தி.மு.க., - எம்.பி., ஜெகத்ரட்சகன், அமைச்சர் துரைமுருகன், முதல்வரின் குடும்பத்தினர் உள்ளிட்ட சிலரின் சொத்துப் பட்டியல் இடம் பெற்றிருந்தது. அதைத் தொடர்ந்து, ஜூலை மாதம் தி.மு.க., பைல்ஸ் பாகம் இரண்டு வெளியிட்டார். அதில், அரசு துறைகளில் ஒப்பந்த பணிகளில் நடந்திருந்த முறைகேடுகள் குறித்த குற்றச்சாட்டுகள் இடம் பெற்றிருந்தன.

தொடர்ந்து தி.மு.க., பைல்ஸ் பாகம் மூன்று என்ற வீடியோப்பதிவை அண்ணாமலை சில நாட்களுக்கு முன்னர் வெளியிட்டார். அதில், தி.மு.க., எம்.பி., டி.ஆர்.பாலு முன்னாள் டி.ஜி.பி., ஜாபர் சேட் இடையிலான தொலைபேசி உரையாடல்கள் இடம்பெற்றிருந்தன.

இந்நிலையில், இதன் தொடர்ச்சியாக, இரண்டாவது டேப் ஒன்றை அண்ணாமலை வெளியிட்டுள்ளார். முன்னாள் மத்திய அமைச்சர் ஆ.ராசா உடன் ஜாபர் சேட் உரையாடல் எனக்கூறி ஆடியோப்பதிவை வெளியிட்டுள்ள அண்ணாமலை, 2ஜி வழக்கில் சாட்சிகள் இவ்வாறு தான் அச்சுறுத்தப்பட்டனர். தி.மு.க., காங்கிரஸ் கூட்டணி அரசு 2ஜி விசாரணையை இப்படித்தான் நடத்தியது என தெரிவித்துள்ளார். மேலும், இது இத்துடன் முடிவடையாது எனவும் கூறியுள்ளார். இதனால், இனி வரும் நாட்களில் கூடுதல் ஆடியோ, வீடியோக்கள் வெளியாகும் என எதிர்பார்க்கப்படுகிறது.