மயிலாடுதுறையில் இருந்து காலை 7:00 மணிக்கு புறப்படும் ரயில் காலை 8:50 மணிக்கு தஞ்சாவூருடன் நிறுத்தப்படுகிறது. இதே போல் பாலக்காடு டவுனில் மதியம் 2:45 மணிக்கு ரயில் புறப்பட்டு இரவு 7:10 மணிக்கு ஈரோடு சென்றடைகிறது. இவ்விரு ரயில்களையும் ஒருங்கிணைத்து தஞ்சாவூரில் காலை 8:55 மணிக்கு புறப்பட்டு திருச்சி, திண்டுக்கல், பழநி, பொள்ளாச்சி வழியே பாலக்காடுக்கு மதியம் 2:40 மணிக்கு சென்றடைந்து அங்கிருந்து 2:45க்கு புறப்பட்டு இரவு 7:10க்கு ஈரோடு சென்றடையும் வகையில் புதிய ரயில் இயக்க ஒப்புதல் தரப்பட்டுள்ளது.

மறுமார்க்கமாக ஈரோட்டில் காலை 7:00 மணிக்கு புறப்பட்டு பாலக்காடுக்கு காலை 11:35 மணிக்கு செல்லும் ரயில் அங்கிருந்து காலை 11:40 மணிக்கு புறப்பட்டு பொள்ளாச்சி, பழநி, திண்டுக்கல், திருச்சி, தஞ்சாவூர் வழியே மயிலாடுதுறைக்கு இரவு 8:30 மணிக்கு சென்றடையும்.

இதேபோல கேரள மாநிலம் புனலுாரில் மாலை 5:15 மணிக்கு புறப்பட்டு கொல்லம், திருவனந்தபுரம், நாகர்கோவில் டவுன், திருநெல்வேலி, கோவில்பட்டி, சாத்துார், விருதுநகர் வழியே மதுரைக்கு அதிகாலை 3:00 மணிக்கு வரும் ரயிலை திண்டுக்கல், திருச்சி, விருத்தாச்சலம் வழியே விழுப்புரத்திற்கு காலை 8:00 மணிக்கு சென்றடையும் வகையில் நீட்டிக்க அனுமதிக்கப்பட்டுள்ளது.

வடமதுரை ரயில் பயணிகள் நலச்சங்க தலைவர் கோவிந்தராஜ் கூறுகையில்'' ஏற்கனவே கடந்தாண்டு இறுதி வரை மதுரை- -விழுப்புரம் ரயிலாக இயக்கப்பட்ட ரயில் தற்போது சில மாதங்களாக திண்டுக்கல்லில் இருந்து அதிகாலை 5:00 மணிக்கு புறப்பட்டு விழுப்புரத்திற்கு காலை 11:15 மணிக்கு இன்டர்சிட்டி எக்ஸ்பிரஸ் ரயிலாக இயக்கப்படுகிறது. புதிய நீட்டிப்பு ரயில் சேவை துவங்கும்போது திண்டுக்கல் - விழுப்புரம் ரயில் தொடர்ந்து இயங்குமா என சந்தேகம் ஏற்பட்டுள்ளது. திருச்சி பகுதியில் இருந்து பழநி பகுதிக்கு நேரடி ரயில் சேவை துவங்குவது வரவேற்கத்தக்கது ''என்றார்.