பொதுச்செயலாளராக பழனிசாமி பொறுப்பேற்ற பின் சந்திக்கும் முதல் சட்டசபை தேர்தல் என்பதால், எப்படியும் ஆட்சியை பிடித்தாக வேண்டும் என்பதில் உறுதியாக உள்ளார். பன்னீர்செல்வம், தினகரனால் கட்சியில் பிளவு ஏற்பட்ட போதிலும் அ.தி.மு.க.,வுக்கென உள்ள ஓட்டு வங்கியை தக்க வைக்கவும், இளைஞர்களை உறுப்பினராக்கவும் மாவட்டந்தோறும் பூத் கமிட்டிகளை அமைத்து அதற்கு பொறுப்பாளர்களை பழனிசாமி நியமித்தார்.

குறிப்பிட்ட நாட்களுக்கு ஒருமுறை அவர்களுடன் ஆலோசனை நடத்தி ஓட்டுகளை உறுதி செய்து வருகிறார்.

இந்நிலையில் முதல்வர் ஸ்டாலின் சமீபத்தில் '30 சதவீத வாக்காளர்களை உறுப்பினராக்க வேண்டும்' என தி.மு.க.,வினருக்கு அறிவுறுத்தினார். இது அ.தி.மு.க.,வினர் இடையே அச்சத்தை ஏற்படுத்தியுள்ளது. பூத் அளவில் ஆட்களை நியமித்து வாக்காளர்களை இப்போதே அ.தி.மு.க., பின்தொடர்ந்து வரும் நிலையில் தி.மு.க., அதில் தலையிட்டு குழப்பத்தை ஏற்படுத்த வாய்ப்புள்ளது என கட்சி நிர்வாகிகள் கருதுகின்றனர். இதுதொடர்பாக ஆலோசிக்க இன்றும், நாளையும் பழனிசாமி தலைமையில் மாவட்ட செயலாளர்கள், பூத் கமிட்டிகளுக்கு நியமிக்கப்பட்ட மாவட்ட பொறுப்பாளர்கள் ஆலோசனைக்கூட்டம் நடக்கிறது.

மதுரை நகர் செயலாளர் செல்லுார் ராஜூ கூறுகையில், ''மாவட்ட வாரியாக ஆலோசனைக்கூட்டம் நடக்க உள்ளது. இதில் பூத் விபரங்கள், நியமிக்கப்பட்ட குழுவின் பணிகள் குறித்து விவாதித்து தேவையான அறிவுரைகளை பழனிசாமி வழங்குவார்'' என்றார்.

திருநெல்வேலி பூத் கமிட்டி பொறுப்பாளரான டாக்டர் சரவணன் கூறுகையில், ''ஒவ்வொரு பூத்திலும் குறைந்தது ஆயிரம் ஓட்டுகள் உள்ளன. பூத்திற்கு தலா 9 பேர் பல்வேறு பொறுப்புகளில் நியமிக்கப்பட்டுள்ளனர். அவர்களுக்கு கீழ் உள்ளவர்கள் ஒவ்வொருவரும் தங்களுக்கு ஒதுக்கீடு செய்யப்பட்ட வார்டுகள், வாக்காளர்களை பின்தொடர்ந்து வருகின்றனர். புதியவர்களையும் உறுப்பினராக்க வேண்டும். இதுதொடர்பாக அடிக்கடி ஆலோசனைக்கூட்டம் நடத்துவதோடு, தினமும் வாட்ஸ் ஆப்பில் அறிவுரைகளை வழங்கி, மாலைக்குள் அதுகுறித்து ஆய்வு செய்து வருகிறோம். அ.தி.மு.க., பூத் கமிட்டிகள் வலுவாக உள்ளன'' என்றார்.