தஞ்சாவூர் மாவட்டம், திருவையாறில், ஸ்ரீ சத்குரு தியாகராஜ சித்தியடைந்த பகுள பஞ்சமி தினத்தில் ஆராதனை விழா ஒவ்வொரு ஆண்டும் ஐந்து நாட்கள் நடைபெறும். இந்தியா மற்றும் உலக அளவில் உள்ள சங்கீத வித்வான்களும், இசை கலைஞர்களும் திருவையாறில் நடக்கும் ஆராதனை விழாவில் ஆண்டுதோறும் பங்கேற்பது உண்டு.

இந்தாண்டு ஆராதனை விழா ஜன.3ம் தேதி துவங்கி 7ம் தேதி வரை ஐந்து நாட்கள் நடைபெற உள்ளது. இதையடுத்து ஆராதனை விழாவை முன்னிட்டு, இன்று காலை (நவ., 30) பந்தக்கால் முகூர்த்தம் விழா நடந்தது. முன்னதாக தியாகராஜருக்கு சிறப்பு அபிஷேகம் அலங்காரம், தீபாரதனை நடைபெற்றது. இந்நிகழ்ச்சியில், அறங்காவலர்கள் சுரேஷ், மூர்த்தி, பொருளாளர் கணேஷ் உள்ளிட்ட நிர்வாக குழு உறுப்பினர்கள் கலந்து கொண்டனர்.

விழாவின் துவக்கமாக ஜன., 3ம் தேதி மாலை 4:30 மணிக்கு மங்கள இசை, துவக்கவிழா நிகழ்ச்சிகளும், இசை நிகழ்ச்சிகளும் நடை பெறுகிறது. விழாவுக்கு சபாவின் தலைவர் வாசன் தலைமை வகிக்க உள்ளார். சிறப்பு விருந்தினராக கலெக்டர் பிரியங்கா பங்கஜம் கலந்துக்கொள்ள உள்ளார்.

விழாவின் முக்கிய நிகழ்வான, ஆராதனை ஜன.7ம் தேதி ஆயிரக்கணக்கான இசை கலைஞர்கள், பஞ்சரத்ன கீர்த்தனைகள் இசைத்து தியாகராஜருக்கு இசை அஞ்சலி செலுத்த உள்ளனர்.