மாவட்டத்தில் வடகிழக்கு பருவமழை பெய்து வருகிறது. தாழ்வான பகுதியில் குளம் போல மழை நீர் தேங்கியது.

ராமநாதபுரம் அருகே பெருங்குளத்தில் வீடுகளுக்குள் தண்ணீர் புகுந்ததால் மக்கள் சிரமப்பட்டனர். நேற்று மாலை 4:00 மணி நிலவரப்படி பதிவான மழை அளவு (மி.மீ.,): ராமநாதபுரம் --75, மண்டபம் -261.40, ராமேஸ்வரம் -411, பாம்பன்-237, தங்கச்சிமடம்-322, பரமக்குடி- 25,திருவாடானை - 11.80, பள்ளமோர்குளம் - 45.20,ஆர்.எஸ்.மங்கலம் -10.40, முதுகுளத்துார் - 48.20, கமுதி-45.80,கடலாடி-71, வாலிநோக்கம் 65.60, என 1641.61 மி.மீ.,பதிவாகியுள்ளது.

மாவட்டத்தில் ஒரே நாளில் சராசரியாக 102.61மி.மீ., மழை பெய்துள்ளது. இன்றும் (நவ.,21) அதிகனமழைபெய்ய வாய்ப்பு உள்ளதாக வானிலை ஆய்வு மையம் ராமநாதபுரத்திற்கு 'ரெட் அலர்ட்'எச்சரிக்கை விடுத்துள்ளது. அனைத்து பகுதிகளிலும் தேவையான முன்னெச்சரிக்கை நடவடிக்கை மேற்கொள்ள வேண்டும் என அதிகாரிகளுக்குகலெக்டர் சிம்ரன்ஜீத் சிங் காலோன் உத்தரவிட்டுள்ளார்.

பாம்பனில் மீனவர் குடிசைகளுக்குள் கடல் நீர்

ராமேஸ்வரம், பாம்பன், தங்கச்சிமடம், மண்டபம் பகுதியில் கனமழை பெய்தது. இதனால் ராமேஸ்வரம் பஸ் ஸ்டாண்ட் அருகிலும், தங்கச்சிமடத்தில் மதுரை-ராமேஸ்வரம் தேசிய நெடுஞ்சாலையில் மழைநீர் குளம்போல் தேங்கியது.

இதனால் ராமேஸ்வரம் கோயிலுக்கு வந்த பக்தர்கள், சுற்றுலா பயணிகளின் வாகனங்கள் ஊர்ந்தபடி சென்றன. மேலும் மண்டபம் எருமைதரவை, பாம்பன் தரவைத்தோப்பு, சின்னப்பாலம், ராமேஸ்வரம் புது ரோடு, இந்திரா நகர் பகுதியில் மழைநீர் வீடுகளை சூழ்ந்ததால் மக்கள் வெளியேற முடியாமல் தவித்தனர்.

நேற்று முன்தினம் இரவு பாம்பனில் கடல் கொந்தளித்து ராட்சத அலைகள் எழுந்ததால் பாம்பன் தெற்குவாடி கடலோரத்தில் உள்ள 20க்கும் மேற்பட்ட மீனவர்களின் குடிசை வீடுகளுக்குள் கடல்நீர் புகுந்தது. இதனால் மீனவர்கள் இரவில் துாங்க முடியாமல் தவித்தனர்.

ராமநாதபுரத்தில் சேதம்

மழை தொடர்ந்து பெய்தால் ராமேஸ்வரம் தீவுப் பகுதியில் 100க்கும் மேற்பட்ட வீடுகளை மழைநீர் சூழ்ந்துள்ளது.

ராமநாதபுரம் நகர், புறநகர் பகுதிகளில் தாழ்வான பகுதிகளில் குளம் போல தண்ணீர் தேங்கியது. ஆளில்லாத இரு பழைய ஓட்டு வீடுகள் சேதமடைந்தன. பள்ளி, கல்லுாரிகளுக்கு நேற்று விடுமுறை அளிக்கப்பட்டது. சந்தை வியாபாரிகள் பாதிக்கப்பட்டனர். குடியிருப்பு பகுதிகளில் தண்ணீர் தேங்கியதால் மக்கள் வீடுகளுக்குள் முடங்கினர்.

மரம் சாய்ந்ததில்கார் நொறுங்கியது

-ராமநாதபுரத்தில் நேற்று மதியம் மகாத்மா காந்திநகர் பகுதியில் இருந்த 50 ஆண்டு பழமையான வேப்ப மரம் வேரோடு சாய்ந்தது. இதில்மரத்திற்கு கீழ் நின்ற கார் நொறுங்கியது. காரில் யாரும் இல்லை. 2 மணி நேரம் போக்குவரத்து பாதிக்கப்பட்டது. தீயணைப்பு வீரர்கள் மரத்தை அகற்றினர். ராமநாதபுரத்தில் பல இடங்களில் மரங்கள் வேரோடு சாய்ந்தன. இவற்றை அப்புறப்படுத்த வந்த தீயணைப்பு வீரர்களிடம் மரம் அறுக்கும் இயந்திரம் இல்லாததால் அரிவாளால் வெட்டினர். மணல் அள்ளும் இயந்திரம் வந்த பிறகே மரத்தை முழுமையாக அப்புறப்படுத்த முடிந்தது.